Мордовия Сабан туенда нурлатлылар Татарстанны тәкъдим итте
Бу - Нурлат районы вәкилләренең Татарстан исеменнән мондый бәйрәмгә Мордовиягә икенче сәфәре. Бу юлы да Нурлат районы Башлыгы Дамир Ишкинеев җитәкчелегендәге 100 дән артык нурлатлы Татарстанны лаеклы тәкъдим итте, үз ишегалларын ачты һәм татарларның көнкүрешен, гореф-гадәтләрен, йолаларын күрсәтте, кунакчыллык, киң күңеллелек, хезмәт сөючәнлек кебек үзенчәлекле сыйфатларын күрсәтте.
Мордва җирендә Сабан туе 17нче тапкыр уздырыла. Татарстан халкы исеменнән бәйрәм хуҗаларын ТР Экология һәм табигый байлыклар министры Александр Шадриков котлады. Ул Мордовия халкына Сабан туен оештырып, Россия халыклары традицияләрен саклау эшендә зур эш башкарулары өчен рәхмәт сүзләрен җиткерде. Монда ук Александр Валерьевич Татарстан Республикасы Рәисе Рөстәм Миңнехановның мөрәҗәгатен укыды, анда мондый юллар да бар иде: «Чара елдан-ел төрле яшьтәге, милләт һәм дин кешеләренең очрашу урыны була. Бер-берсен яхшырак аңларга, мәдәни һәм рухи яктан үзара баерга, халыклар арасында тынычлыкка һәм татулыкка ярдәм итә.
Бәйрәмдә катнашучыларга Нурлат районы Башлыгы Дамир Ишкинеев мөрәҗәгать итте, аларны татар, рус һәм мордва телләрендә сәламләде.
"Сезне милли Сабан туе бәйрәме белән котлыйм. Бу бәйрәм күптәннән милли чикләрне үтеп, чын мәгънәсендә бөтенхалык бәйрәменә әверелде. Үзенең кунакчыллыгы һәм көр рухы белән ул йөрәкләрне яулый, безнең чиксез Россия иле халыкларының бай мәдәни мирасының энҗесе, төрле милләт кешеләренең бердәмлеге һәм татулыгы символы, көч һәм ныклык күрсәткече булып тора. Татар җәмгыятьләре һәм башка күп кенә милли-мәдәни оешмалар вәкилләренең Мордовия территориясендә бер максат белән эшләвен күрү бик күңелле – барысы да тыныч һәм тату яшәсен, халкыбызның мәдәнияте үзара баетылсын һәм безне көчлерәк итсен», – дип билгеләп үтте ул.
Мордовия Сабан туен нурлатлыларның чыгышлары ямьләндерде: бәйрәмдә катнашучылар Республиканың атказанган мәдәният хезмәткәре Ольга Ильина җитәкчелегендәге «Эсперанса» эстрада бию ансамбле чыгышларын көчле алкышлар белән ккаршылады. Ә Татарстан Республикасының атказанган артисты Фирдүс Тямаевның җырлары бу көнне чын бүләк булды: тамашачылар алкышлап кына калмадылар, бәйрәм сәхнәсен әйләндереп алдылар, җырладылар, биеделәр.
Аннары рәсми затлар Нурлат ишегалдына килделәр, аларны традицион милли ризыклар белән каршы алдылар. Биредә кунаклар декоратив-кулланма иҗат күргәзмәләрендә, мастер-классларда булдылар, «Чекан-бабай»да тәңкәләр кою остаханәсен карады. Бәйрәм кунакларының күбесен безнең фотозоналар җәлеп итте, аларның берсе – ат – бөтен чиратны җыйды. Мордовия Сабан туеның чын кульминациясе Нурлат чәк-чәге булды. Бәйрәмгә «Ягуар» аш-су осталары бу 230 килограммлы милли тәм-томны пешерде! Аны чара кунаклары да авыз итә алды: бәйрәм тәмамланганнан соң чәк-чәкне теләгән һәркемгә тараттылар.