Нурлатта Уяв күңелле һәм матур үтте
Бүген Нурлатта Уяв чуваш милли мәдәнияте бәйрәме узды.
Бу бәйрәмне Нурлат районында яшәүче барлык халык вәкилләре дә бертигез ярата. Күп еллар ул дуслык һәм бердәмлек билгесе астында уза.
Иртәдән үк интерактив мәйданчыкларның эшләве нурлатлыларның игътибарын җәлеп итте. Аларның эше белән хөрмәтле кунаклар танышты: Татарстан Республикасы Дәүләт Советы депутаты, «Татнефтепром-Зюзеевнефть» акционерлык җәмгыяте генераль директоры Шамил Ягудин, Татарстан Республикасы Югары Суды судьясы, Татарстан Республикасының атказанган юристы, меценат, якташыбыз Александр Огонев, Татарстан Республикасы Раиса матбугат хезмәте җитәкчесе Лилия Галимова, «Идея» технопракасын үстерү буенча директор Николай Абруков һ. б.
Бәйрәмдә кыска вакытлы ялга килгән мобилизацияләнгән нурлатлылар да катнашты. Алар барысы да Нурлат районы Башлыгы Дамир Ишкинеев озатуында тематик мәйданчыклар буйлап үттеләр. Аларның берсендә чуваш халкының милли ризыклары һәм эчемлекләре конкурсы узды, анда бәйрәм кунакларына бик күп төрле чуваш ризыклары һәм рецептлар буенча эшләнгән традицион сара эчемлеге тәкъдим ителде, аны әзерләү тәртибе нәселдән нәселгә тапшырыла һәм еш кына сер итеп саклана. “Балалар үсеше Үзәге” мәйданчыгында саклагыч курчак ясау буенча мастер-класста катнашырга мөмкин иде.
“Уяв”та волонтерлык эшчәнлеге дә киң тәкъдим ителде, аның турында кунакларга «Маскировочка», «Җиңү өчен тәм-томнар», «Үзебезнекеләр өчен тегәбез» хәрәкәтләре активистлары сөйләде. Җирлекара китапханә мәйданчыгында да халык күп булды, бәйрәм кунакларының игътибарын Кама аръягы һәм Нурлат шәһәре тарихы төбәк музееның фотокүргәзмәсе җәлеп итте.
Бәйрәмнең рәсми старты төп сәхнә янындагы үзәк мәйданчыкта бирелде. Район Башлыгы Дамир Ишкинеев бәйрәм кунакларын чуваш һәм рус телләрендә сәламләде.
"Чуваш халкының күп гасырлык тарихы - бик киң, үзенчәлекле һәм кызыклы. “Уяв” милли традицияләрне саклау үрнәге генә түгел, ә безнең халыклар арасында тынычлык һәм татулыкны ныгытуның мөһим өлешләреннән берсе булып тора. Һәр ел саен бу бәйрәм үткәнне һәм хәзерге заманны гармонияле берләштерә, туган якка, иҗади хезмәткә мәхәббәт тәрбияли», – диде Дамир Азатович.
Мактаулы кунаклар да нурлатлыларга котлау сүзе белән мөрәҗәгать иттеләр, бүләкләү тантанасын да үткәрделәр. Мәсәлән, Татарстан Республикасы Дәүләт Советы Рәисенең Рәхмәт хатын «Родник» чуаш халык ансамбле аккомпаниаторы Василий Абрамовка тапшырдылар, Әхмәт авыл җирлеге башкарма комитеты җитәкчесе урынбасары Ирина Сапожникованы «Татарстан Республикасы Муниципаль берәмлекләр советы» Ассоциациясенең Мактау грамотасы белән билгеләп үттеләр, балалар китапханәсе мөдире Галина Ерышовага «Мәдәнияттәге казанышлары өчен» Татарстан Республикасы Мәдәният министрлыгы күкрәк билгесен тапшырдылар.
Бәйрәмнең төп бизәге, әлбәттә, әйлән-бәйлән булды. Ул кунакларны мөхтәрәм карт дога белән каен таягын җиргә бәргәннән соң башланды, бу миссияне Иван Павлов башкарды. Бу бәйрәмнең тагын бер традициясе, ул яхшы һәм игелекле эшнең башлануын билгели.
Тантананың шатлыклы һәм якты атмосферасы барысына да бәйрәм кәефе бүләк итте, аны чуваш эстрадасы артисты Вячеслав Христофоров чыгышы да матурлады.
Кече сәхнәдә “Уйна, гармун!” район халык иҗаты фестивале узды. Бәйрәмгә “Аталан” яшьләр иҗат фестивале аерым атмосфера бирде.