Төрле елларда Ватан чикләрен саклаган нурлатлылар чик сакчысы көнен билгеләп үтәләр
Чик сакчылары аллеясында традицион рәвештә Россия чик буе гаскәрләренең 106 еллыгына багышланган тантаналы митинг узды.
Чарага хезмәт иткән чик сакчылары, аларның туганнары һәм якыннары, шулай ук районның төрле гаскәрләре вәкилләре, сугыш хәрәкәтләре ветераннары, нурлатлылар, шәһәр кунаклары җыелды.
Алар арасында Матвеевлар гаиләсе дә бар иде. Бәйрәмгә алар 8 яшьлек уллары Илья белән килгәннәр. Ул, әтисе кебек үк, чик сакчысы формасында килгән.
"Бу бәйрәм инде күптән безнең өчен гаилә бәйрәменә әверелде. Мин 1995-1997 елларда чик буенда хезмәт иттем, шуннан бирле бу минем өчен мөһим көн. Хатыным һәм балаларымның миңа ярдәм итүләре сөендерә, һәр ел минем белән чарада катнашалар. Безнең өч балабызның да формалы киемнәре - тельняшкалар һәм беретлары бар. Алар безнең үрнәктә патриотизмга, Ватанга мәхәббәткә өйрәнәләр», – дип уртаклашты гаилә башлыгы Александр Матвеев.
Чара истәлек мемориалына чәчәкләр салудан башланды. Шуннан соң бер минут тынлык белән сугышчан иптәшләренең истәлеген хөрмәтләделәр. Чик сакчыларыннан соң аллея буйлап тантаналы адым белән булачак Ватанны саклаучылар “Кыңгырау” балалар бакчасы сабыйлары узды.
Район башлыгы Дамир Ишкинеев тантанада катнашучыларга котлау сүзләре белән мөрәҗәгать итте.
"Чик сакчылары-махсус гаскәр, алар безнең бөек Россия чикләрен саклыйлар. Чик сакчылары илгә куркыныч янаганда, дошман һөҗүм иткәндә, һәрвакыт беренче булып һөҗүмне кабул итәләр. Һәм чик сакчылары беркайчан да чигенмиләр, чикләрне ныклык, кыюлык һәм батырлык белән саклыйлар. Мин сезгә ил чикләренең һәрвакытта нык булуын, сезгә һәм якыннарыгызга сәламәтлек, күк йөзенең тыныч булуын телим. Бәйрәм белән!, - дип билгеләп үтте Дамир Азатович.
Әфганстандагы сугыш һәм башка локаль конфликтлар инвалидларының Татарстан Республика иҗтимагый оешмасының Нурлат бүлеге рәисе Ришат Сафиуллин, Нурлат районы чик буе гаскәрләре ветераннары берлеге рәисе Виктор Морозов һәм башкалар да үз котлауларын җиткерделәр.
Котлаулар бүләкләү тантанасы белән чиратлашып барды. Берничә чик сакчысы Әфганстандагы сугыш инвалидларының иҗтимагый оешмасыннан, чик буе гаскәрләре берлегеннән Рәхмәт хатларына, «Россия чик буе гаскәрләренең 105 еллыгы» медальләренә лаек булды.
Район чик сакчылары Дамир Ишкинеевка ярдәме һәм һәрьяклап булышлык күрсәтүе өчен рәхмәт йөзеннән чик буе гаскәрләре символикасы белән футболка тапшырдылар.
Алар «Кыңгырау» мәктәпкәчә учреждениесе коллективын да рәхмәт хаты белән билгеләп үттеләр. Сүз уңаеннан, балалар бакчасында тәрбияләнүчеләрнең чыгышлары тамашачыларга бәйрәм кәефе бирде. Чараны алып баручы Антонина Артамонова башкаруында иҗади номерлар да яңгырады.
Чик сакчылары аллеясындагы тантана истәлеккә фото белән тәмамланды.