Җиңү Көнен Нурлатта тантаналы каршы алдылар
Хәтер һәм Дан мемориаль комплексы территориясендә традиция буенча тантаналы митинг һәм Җиңү Парады узды.
Тантананың төп кунагы Чулпан авылыннан Бөек Ватан сугышы ветераны Каим Сәмигулла улы Сәмигуллин булды. Аны, традиция буенча, бәйрәмгә килгән күпсанлы нурлатлылар көчле алкышлар белән каршы алды.
Тантаналы чараларга район Башлыгы Дамир Ишкинеев старт бирде, ул хөрмәтле ветераннарга, тыл хезмәтчәннәренә, бәйрәм кунакларына сәламләү сүзе белән мөрәҗәгать итте.
Безне 1945 елның май көненнән дистә еллар аерып тора, ул вакытта бөтен дөнья Совет солдатларының батырлыгына кул чаба. Бөек Ватан сугышының барлык фронтларында 16 меңнән артык нурлатлы катнашкан. 1941 елның ноябрендә безнең шәһәрдә оештырылган 51нче мотоукчылар бригадасы Мәскәүне яклый, аннары Сталинград сугышында катнаша, Чехословакиядә һәм Польшада сугыша, сугышны Берлинда тәмамлый. Якташларыбыз Ватанны батырларча якладылар, нык тордылар һәм җиңделәр. Тарихка алтын хәрефләр белән аларның исемнәре язылуы белән горурланабыз. Җиңү фронтта гына түгел, тирән тылда, шул исәптән безнең районда да коелды", - диде Дамир Азатович котлау чыгышында.
Нурлатлыларга котлау сүзләренә Татарстан Экология һәм табигый байлыклар министры Александр Шадриков та кушылды, ул Татарстан Рәисе Рөстәм Миңнеханов исеменнән катнашучыларны Җиңү көне белән котлады.
Нурлат шәһәре һәм Нурлат районы хәрби комиссары Заһир Абдуллин Бөек Ватан сугышында һәлак булган һәм тыныч вакытта яралардан вафат булган барлык нурлатлылар хөрмәтенә бер минут тынлык игълан итте.
Митингтан соң бәйрәм программасын Җиңү Парады дәвам итте. Биредә шәһәр мәктәпләренең, техникумның яшь армиячеләре, Нурлатның «Сугышчан туганлык» вәкилләре – диңгезчеләр, чик сакчылары, десантчылар, локаль сугышларда катнашучылар һ.б. катнашты. Алар мемориаль комплекс территориясендә тантаналы марш белән үттеләр, сугыш ветеранына һәм тыл хезмәтчәннәренә хөрмәт күрсәттеләр.
Чара мәдәният хезмәткәрләре, балалар сәнгать мәктәбе укучылары, «Эсперанса» ансамбле әзерләгән театральләштерелгән спектакль белән дәвам итте.