Нурлат районында чокырларны ремонтлау ел әйләнәсе алып барыла
Юлны ремонтлау белән мәшгуль булган НУАД эшчеләрен җәй көне генә түгел, ә кыш көне дә күрергә мөмкин, алар аварияле чокырларны «ямыйлар».
- Чокыр ремонты ел әйләнәсе бара, - диде НУАДның баш инженеры Александр Давыдкин. - Әлегә мондый эшләрне салкын асфальт белән башкарабыз.
Шушы көннәрдә юлчылар Самаренкин - Дружба урамнары киселешендә шушы эш белән мәшгуль булдылар. Берсе чокырны чистарта, икенчесе махсус җайланма белән аны өрдерә, өченчесе, чокырга асфальт сала, ерактан ук эшчеләрне күргәч автомобильчеләр дә тизлекне киметәләр.
- Самаренкин урамында авыр йөк ташучы транспорт хәрәкәте арта бара, мөгаен, юл өслеге түзә алмыйдыр, – диде фотоаппарат белән журналистларны күргәч, җиңел машина йөртүче тәрәзәгә карап.
Баш инженер сөйләвенчә, плюс температура тотрыклы тора башлагач, чокырны кайнар асфальт белән ремонтлауга керешәчәкләр.
- Салкынның хезмәт итү вакыты бер ел. Ләкин ул кайнар асфальттан бернәрсә белән дә аерылып тормый, – дип аңлатты Александр Николаевич. Гомумән алганда, Самаренкин урамында быел реконструкция үткәрү планлаштырыла. - Совет урамыннан алып юлда 960 метр озынлыктагы Товарищеская урамы киселешенә кадәр асфальтны алышыначак, тротуар капиталь ремонтланачак, – диде баш инженер.
Нурлат автомобиль юллары идарәсе быел да «Безнең ишегалды» республика программасы кысаларында ишегалды территорияләрен төзекләндерү буенча генераль подрядчы булып тора. Тиздән юлчыларның тыгыз графигына 17 ишегалдын төзекләндерү дә туры киләчәк, алар анда кар эреп беткәннән соң эшли башлаячак.
Гомумән алганда, агымдагы сезон да зур күләмле булуы белән аерылыр торачак. Күпердән Кондырча ландшафт паркына кадәр юлны капиталь ремонтлаудан тыш, шул ук юнәлештә тротуар төзү дә планлаштырыла. Димәк, машина йөртүчеләр генә түгел, җәяүлеләр дә сөенәчәк.