Нурлатта “Эхо веков в истории семьи – Тарихта без эзлебез" фестиваленең муниципаль этабы узды
Җиңүче исеме өчен 4 гаилә командасы – Артамоновлар, Бикташевлар, Соренковлар һәм Гирфановлар көрәште.
Конкурсның беренче этабы кысаларында шәһәр Мәдәният сарае фойесында күргәзмәләр оештырылды, анда катнашучылар үзләренең шәҗәрә агачларын, буыннан – буынга тапшырыла торган гаилә ядкәрләрен, милли ризыкларны һәм эчемлекләрне тәкъдим иттеләр, милли традицияләр турында сөйләделәр. Мәсәлән, Гирфановларның шәҗәрә агачы җиде буын вәкилләреннән тора, һәм бүгенге көндә бу нәселнең меңгә якын вәкиле бар.
"Мин Ульяновск, Самара, Казан шәһәрләрендә архивларны өйрәндем һәм үз нәселем турында бай материал тупладым. Аны безнең бабабыз Капустьев нигезләгән. Ул солдат улы булган, Түбән Нурлатта 1737 елда ук урнашкан», – дип сөйләде Хафизулла Гыйрфанов. Аның гаилә елъязмасын гына түгел, туган ягын да тикшерүләре авылдашлары тарафыннан «Вакытлар аша агадыр Кондырча» һәм «Нурлат районы мәчетләре» авторлык китапларында чагылыш тапкан.
Артамонов-Андреевлар гаиләсе нәселе XVIII гасырдан башлана, аларның генеалогик агачында 500 гаилә вәкиле чагылыш тапкан. Ә Соренковлар өч буын медицина хезмәткәрләре династиясен тәкъдим итте, Татьяна Геннадиевна сүзләренчә, аларның медицина тармагындагы гомуми стажы 111 ел тәшкил итә.
Күргәзмәдә гаилә ядкәрләре дә чагылыш тапкан, алар буыннан-буынга тапшырыла һәм нәсел вәкилләре тарафыннан сакланып килә. Мәсәлән, Бикташевлар гаиләсе экспозициясендә гармун, чемодан, сәгать, Коръән кебек бик сирәк әйберләрне күрергә мөмкин иде.
"Гармун һәм чемодан Бөек Ватан сугышында катнашкан иремнең бабасы Минәхмәт Ильмухинныкы иде. Фронтка ул гармун белән китә һәм сугышның бөтен юлы, өйгә кайтканчыга кадәр, аның белән аерылышмый. Ә минем бабам Харис Гыйрфановтан сәгатьләр калды. Ул Беренче бөтендөнья, Бөек Ватан, совет-япон сугышларында катнаша, хәрби хезмәттән соң үзе белән кесә сәгатьләрен алып кайта. Ә 1930 елгы Коръән турында Фирүзә Бикташева сөйләде.
Фестивальнең икенче этабы мәдәният сарае сәхнәсендә узды. Монда һәр команда үзенең визит карточкасын, аның кысаларында үзенең шәҗәрәсен, традицияләрен якты концерт программасы белән тәкъдим итте.
Гаилә командаларының чыгышларын Казаннан килгән компетентлы жюри бәяләде.
"Эхо веков в истории семьи-Тарихта без эзлебез” фестивален уздыру традициягә әверелде. Шунысы игътибарга лаек, быел әзерләнгән барлык гаиләләр, иң мөһиме, үз тамырларын, документларын өйрәнү белән шөгыльләнәләр, раритетлар саклыйлар, Шәҗәрә агачлары төзиләр. Бу гаиләнең барлык әгъзаларын берләштерә, алар үз тарихларын, җиденче буынга кадәрге бабаларын белергә тиеш. Нурлат катнашучыларына килгәндә, алар жюри бәяләгән барлык критерийлар буенча әзерләнгәнен күрәбез, алар зона этабында лаеклы чыгыш ясар дип өметләнәбез», – диде ТР Дәүләт архивы директоры Сергей Горохов.
Фестивальдә катнашучыларны һәм кунакларны бүләкләү тантанасында район Башкарма комитеты җитәкчесенең социаль мәсьәләләр буенча урынбасары Оксана Терентьева сәламләде.
"Безнең катнашучылар кыска вакыт эчендә чыгышларын әзерләделәр һәм үзләренең шәҗәрәләрен тулысынча ачтылар. Киләчәк буын да бабаларының, нәселләренең тарихын белер дип өметләнәбез", - дип билгеләп үтте ул.
Ике этап нәтиҗәләре буенча Гыйрфановлар гаиләсе җиңү яулады. Аларга 50 мең сумлык диплом һәм сертификат тапшырылды. Алар фестивальнең зона этабында Нурлатны тәкъдим итәчәкләр.
Икенче урында – Артамоновлар гаиләсе, өченчедә-Бикташевлар. Алар да дипломнарга һәм акчалата сертификатларга лаек булдылар.