Нурлат элеваторы хезмәткәрләре район җитәкчелеге белән очрашты
Чираттагы гражданнар җыенында ТР Экология һәм табигый байлыклар министры Александр Шадриков катнашты.
Узган елгы эш нәтиҗәләре турында предприятие генераль директоры Мансур Гайфуллин хисап тотты.
"Гомумән алганда, узган ел безнең өчен уңышлы булды, без 110 мең тонна ашлык кабул иттек, һава шартлары безгә тиз һәм югалтуларсыз бөтен уңышны кабул итәргә, аны киптерергә һәм саклауга куярга мөмкинлек бирде. Безнең предприятие коллективы 116 кеше тәшкил итә, сезонга өстәмә рәвештә тагын 40тан артык хезмәткәр эшкә урнашты. Уртача хезмәт хакы 37 мең сум. Бүгенге көндә без ашлыкны автотранспорт белән дә, тимер юл белән дә җибәрәбез.
Агымдагы елга планнарга килгәндә, безгә яңа сезонга ныклап әзерләнергә кирәк, 1 июньгә барлык ремонт һәм әзерлек эшләрен тәмамларга кирәк», – дип билгеләп үтте Мансур Гайфуллин.
Муниципалитетның социаль-икътисади үсеше нәтиҗәләре белән Нурлат районы Башлыгы Дамир Ишкинеев таныштырды.
Республикада татарстанлыларның тормыш сыйфатын яхшыртуга юнәлдерелгән программалар, безнең төбәккә килеп җиткән һава торышы аномалияләре, якташларыбызның батырлыклары, быелгы төп сәяси вакыйга - илебез Президентын сайлаулар турында республиканың баш экологы да сөйләде.
"Хәзер безгә, беркайчан да булмаганча, тагын да ныграк берләшергә, илебезнең көченең бердәмлектә булуын күрсәтергә кирәк. Безнең сугышчылар хәзер сугыш кырларында, алар, үз сәламәтлекләрен, ә кайвакыт тормышларын куркыныч астына куеп, Россия мәнфәгатьләрен яклыйлар, алар чын геройлар, аларның исемнәре ил тарихына алтын хәрефләр белән язылачак», – диде Александр Валерьевич.
Хөрмәтле кунаклар катнашында бүләкләү тантанасы да узды, биредә Россиядә 2024 ел – Гаилә елы итеп игълан ителгәнчә, район башлыгының Мактау грамоталарын һәм Рәхмәт хатларын предприятиенең күп балалы хезмәткәрләре, шулай ук предприятиедә гомуми хезмәт стажы дистә еллар тәшкил иткән гаилә династияләре вәкилләре алды. Алар арасында Ольга Галимова да бар иде.
"Монда мин 20 елга якын эшлим, башта орлыкларны тикшерүгә алучы, бүгенге көндә производство лабораториясендә инженер-лаборант булып хезмәт куям. Минем эзләремнән кызымның да китүенә шатмын, димәк, безнең династия дәвам итә», – дип сөйләде Ольга Галимова, бу көнне аңа күп балалы әни буларак бүләк тапшырдылар, аларның гаиләсендә 6 бала тәрбияләнә.