Иске Чаллыда Советлар Союзы Герое Николай Синдряков истәлегенә багышланган чаңгы ярышлары узды (+фоторепортаж)
Иске Чаллы авылында, Советлар Союзы Герое Николай Кузьмич Синдряковның туган җирендә, 1967 елдан башлап герой истәлегенә чаңгы ярышлары үткәрелеп килә, быел алар 57нче тапкыр уздырылды. Быел искечаллылылар Геройның тууына 100 ел тулуга багышланган ярышларга махсус кәеф белән әзерләнделәр. Туган авылында легендар якташыбыз турында истәлекне саклыйлар. Традицион чаңгы ярышлары да тантаналы чарадан башланды, анда Советлар Союзы Герое Николай Синдряковның тормышы һәм батырлык юлы турында тагын бер тапкыр горурлык белән сөйләделәр, мәктәп укучылары, чарада катнашучылар, авылдашлар, туганнары һәйкәлгә веноклар салдылар.
Ярышларны спорт ветераннары - 77 яшьлек Анатолий Елаков һәм 79 яшьлек Борис Леонтьев ачты. Ике ветеран да озак еллар дәвамында ярышларда даими катнашалар, ә Анатолий Николаевич шулай ук оештыручыларның берсе булып тора. Озак еллар җирле мәктәптә физкультура укытучысы булып эшләгән ветеран яшь буын өчен үрнәк булып тора, ә финишны ул Россия Федерациясе флагы белән тәмамлый.
Николай Синдряков истәлегенә ярышларның иң күренекле өлеше - мәктәп командалары арасында эстафета узышлары. Һава шартлары аркасында бу юлы аларда бары тик җирле мәктәп командалары гына катнашты. Әмма моңа да карамастан, ярышлар катнашучылар арасында гына түгел, җанатарларда да шактый эмоцияләр һәм якты тәэсирләр тудырды. Ярышларның чын герое 8 сыйныф укучысы Владимир Семенов булды, ул хәл итүче алтынчы этапта көндәшеннән җиңүне тартып алып, үз командасына җиңү китерде. Көндәшлек рухында спринт-ярышларда катнашучылар арасында да ярышлар узды, алар арасында республиканың Аксубай, Чистай районнарыннан, шулай ук Самара өлкәсеннән чаңгычылар бар иде.
Җиңүчеләр һәм призерлар район Башкарма комитетының яшьләр эшләре һәм спорт бүлеге, Иске Чаллы авыл җирлеге башкарма комитеты, урта гомуми белем бирү мәктәбе оештыручыларыннан кубоклар, медальләр, грамоталар һәм призлар белән бүләкләнделәр. Спорт чарасын уздыруда Иске Чаллы авыл җирлеге Советы депутаты Артур Яһудин, "Элис" ҖЧҖ директоры Сергей Бархаткин, геройның туганнары спонсорлык ярдәме һ. б. күрсәттеләр.