Нурлатта Гаилә елын ачу кысаларында гаилә тормышы юбилярларын хөрмәтләделәр
Чара Никахлашу сараенда узды.
Тантаналы чарага 55 ел бергә яшәгән Лидия һәм Георгий Прокопьевлар, шулай ук алтын туйларын билгеләп үткән гаиләләр – Исхак һәм Миннегөл Мәүлетовлар, Мингәрәй һәм Тәскирә Гыйләҗетдиновлар, Зоя һәм Владимир Молчановлар чакырылды. Аларны хөрмәтле кунаклар, күпсанлы балалары, оныклары һәм оныкчыклары көткән Мендельсон маршы астында алар, ярты гасыр элек кебек үк, тантаналар залына үттеләр.
Гаилә тормышы юбилярларын Нурлат районы Башлыгы вазыйфаларын башкаручы Линар Маняпов сәламләде.
"Бүген Россиядә Гаилә елын ачу уңаеннан без сезне хөрмәтлибез. Сез илебезнең көчен, куәтен, гореф-гадәтләрен гәүдәләндерәсез, нәкъ менә сезнең кебек нык гаиләләрдә безнең ил тора. Бүген бу аеруча актуаль. Без сезне тормышыгыздагы мөһим вакыйга белән котлыйбыз, сезгә ныклы сәламәтлек, иминлек һәм бәхетегез тулы булсын дип телибез. Сезнең гаилә хөрмәт һәм мәхәббәттә яшәсен", - диде Линар Нурисламович.
Җылы теләкләр белән ул аларга чәчәкләр, котлау грамотасы һәм бүләкләр тапшырды.
Чара районның үзешчән артистлары башкаруындагы җырлар һәм котлаулар, гаилә тормышы юбилярларының балаларыннан, оныкларыннан, оныкчыкларыннан рәхмәт сүзләре белән дәвам итте.
Илюткино авылыннан Георгий һәм Лидия Прокопьевлар быел зөбәрҗәт туйларын билгеләп үттеләр. Алар биш бала үстергәннәр, ир белән хатынның бүген зур һәм тату гаиләсе бар – аларның мәхәббәт һәм хөрмәте үрнәгендә 11 онык һәм 4 оныкчыклары тәрбияләнә.
"Балаларга һәрвакыт тату һәм мәхәббәт белән яшәргә киңәш итәбез, бу гаилә бәхетенең нигезе», – дип уртаклаштылар алар.
Исхак һәм Миннегөл Мәүлетовлар 1 гыйнварда якыннарыннан һәм туганнарыннан Яңа ел белән генә түгел, алтын туй белән дә котлаулар кабул иттеләр, нәкъ менә шушы көнне 50 ел элек алар гаилә корган.
"Без гомер буе бергә бер авылдан, Түбән Нурлаттан, күршеләр, бергә үстек, 1нче сыйныфтан бергә укыдык дип әйтергә була. Бергәләп үзара аңлашып яшәргә һәм нык гаилә корырга безгә мәхәббәт ярдәм итте, без аны бүгенге көнгә кадәр саклый алдык. Безне мондый искиткеч чарага чакыруыгыз, онытмавыгыз өчен рәхмәт безгә бик рәхәт», – дип уртаклаштылар Мәүлетовлар.