Нурлатта сайлаучыларга мәгълүмат таратучыларны укыта башладылар
«ИнформУИК» программасы буенча сайлаучыларга адреслы мәгълүмат бирү 17 февральдә башлана һәм 7 мартка кадәр дәвам итәчәк. Аның ничек узачагына бүген шәһәр участок сайлау комиссияләре әгъзаларын өйрәттеләр. Чөнки элек сайлау комиссияләре әгъзалары мәгълүмат листовкалары таратып, аларны почта тартмаларына салып йөргән булсалар, хәзер алар сайлаучыларга адреслы рәвештә, мобиль кушымтада каралганча, киләчәк.
"Безнең өчен бу яңалык. Мәгълүмат бирүдә сайлаучыларга мәгълүмат таратучылар махсус мобиль кушымта ИнформУИК кулланачак. Бездә һәр сайлаучыга барып җитү бурычы тора», – диде районда сайлау процессы өчен җаваплы Нурлат районы башлыгы урынбасары Линар Маняпов.
Укуны Нурлат шәһәренең территориаль сайлау комиссиясе рәисе Алсу Рәхмәтуллина үткәрде. Ул «ИнформУИК» сайлаучыларга мәгълүмат бирү проекты программасы турында сөйләде.
"Бу участок сайлау комиссияләренең эшен җиңеләйтә торган яңа форма һәм шул ук вакытта сайлаучыларга мәгълүмат таратучылар - комиссия әгъзалары сайлаучылар белән элемтәгә чыгачак. Алар сайлаучыларга сайлаулар, сайлау тәртибе, тавыш бирү формалары турында сөйләячәк. Бүгенге уку барышында шәһәрнең УИК әгъзалары үз смартфоннарына мобиль кушымтаны күчереп урнаштырдылар, анда эшләү бик җиңел. Шәһәрдә 17 февральдән 7 мартка кадәр 65 кеше, авылларда 120 кеше эшләячәк. Киләсе атнада авыл участок сайлау комиссияләре өчен дә шундый ук укулар узачак", - диде Алсу Рәхмәтуллина.