Нурлатта гадәттән тыш хәлләр буенча комиссиянең планнан тыш утырышы узды
Янгын турында күршеләре көн уртасында хәбәр итә. Янгын сүндерүчеләр килгәнче, Полевая урамындагы 2нче йорт яна, тулысынча ут белән чолгап алынган була. Гараж да, сарай да янган. Ут күршенең шәхси гаражы түбәсенә дә якынлаша.
Күршеләре әйтүенчә, йортта 1955 елда туган ялгыз гражданин В.Н.Бикинеев яшәгән, һәм аңа йортка ут капканчы, тагын бер ир-ат килгән. Соңрак бу 1968 елда туган Е.Н.Ерыгин булуы ачыкланган. Ике мәет тә төзелеш материаллары җимерекләре астында бик нык янган хәлдә табылган. Фаҗиганең сәбәпләре ачыклана.
Гадәттән тыш хәлләр комиссиясе рәисе – Нурлат Башкарма комитеты җитәкчесе Әсгать Габдуллин киңәшмәдә катнашучыларны хәлне анализларга һәм нәтиҗәләр ясарга чакырды.
"Тимер юл поселогы һәм Шикәрчеләр бистәсе микрорайоннарындагы торак йортлар һәм йорт яны корылмалары, кагыйдә буларак, бер-берсеннән якын ераклыкта урнашкан. Иске агач йортларда нигездә ялгыз кешеләр, өлкән яшьтәге кешеләр яши, һәм еш кына алар мичне утын белән тутыралар, аларга газ кертелмәгән. Шуңа күрә мондый микрорайоннар безнең аерым игътибар зонасында булырга тиеш, – дип билгеләп үтте Әсгать Касыймович.
Комиссия әгъзалары арасында нигездә шәһәр һәм район гражданнарының иминлеген тәэмин итү өчен җавап бирүче бүлекчәләр җитәкчеләре бар. Алар имин булмаган гаиләләрне, ялгыз кешеләрне тагын да күбрәк контрольгә алу, аларның йортларында янгынга каршы җайланмалар – хәбәрчеләр урнаштыруга ирешү кирәклеге турында тәкъдимнәр кертәләр. Моның өчен Яңа елга кадәр шәһәрдә дә, авылда да хуҗалыкларны йөреп чыгарга, шул ук вакытта халыкка махсус әзерләнгән белешмәлекләрне таратырга кирәк.
Яңа ел бәйрәмнәре якынлаша, фатирларда, йортларда, биналарда күп санлы гирляндалар, светодиод тасмалар урнаштырыла. Кызганычка каршы, куркынычсызлык техникасын тиешенчә үтәмәү бәлагә китерергә мөмкин, мәсәлән, Яңа Чишмә районында күптән түгел Яңа елга бизәлгән йорт янган. Арзанлык артыннан куып, ә кайвакыт белмичә ышанычсыз гирляндалар һәм тасмалар сатып алына, бизәнү әйберләренең электр элементларын ачык итеп артык күп куллану аркасында, чыбыкның көчәнешенә түзә алмыйча, кыска ялганыш чыгарга мөмкин. Шул ук вакытта белгечләр IP-65 гирляндаларына һәм светодиодлы тасмаларга өстенлек бирү яхшырак дип киңәш итә, алар бәясе дә башкалардан аз гына югарырак.
ТОС һәм авыл җирлекләре җитәкчеләренә территорияләрне кардан чистартканда янгын сүндерүчеләр өчен гидрантларга керү юллары буш булуына игътибар итәргә кирәк.