Нурлатта төп Яңа ел чыршысы ачылды
Яңа ел алдыннан үзәк чыршыны ачу уңаеннан бәйрәм чарасы матур һәм Яңа ел бәйрәме кебек күңелле үтте. Ул үзенең якты иллюминациясе, бизәлеше белән сөендерде. Гомумән, бөтен үзәк мәйдан ялтырап тора: монда яңа ел бәйрәменең күп кенә атрибутлары һәм элементлары, гирляндалар урнаштырылган. Нурлатлыларны күпсанлы фотозоналар сөендерде, балалар биредә урнаштырылган агач таулардан рәхәтләнеп шуалар. Ә театр скверы сәхнәсеннән Яңа ел белән беренче котлаулар яңгырады. Аларны Нурлат районы башлыгы Дамир Ишкинеев ирештерде.
"Мин сезне бүгенге чара белән чын күңелдән котлыйм. Узган ел җиңел булмады, ләкин уңышлы булды. Нурлат һәм район үсеш алды, безнең арада дуслык һәм татулык хөкем сөрде, моның өчен сезгә зур рәхмәт. Яңа елда бездә бары тик шатлыклы вакыйгалар, бәхетле мизгелләр генә булуын, җиребездә тынычлык урнашуын, махсус хәрби операциядә булган егетләрнең өйләренә кайтуын телим. Киләсе Яңа ел белән, сез, хөрмәтле нурлатлылар. Сезгә бәхет һәм уңышлар!, диде ул.
Бәйрәм кичәсе концерт программасы, уеннар, спорт ярышлары белән дәвам итте. Кайнар ризык, тәм-томнар сату нокталары да эшләде. Кыскасы, төп чыршыны ачу яңа ел бәйрәмнәренә зур старт бирде.