Нурлат районында сугышчы Фәнил Әмир улы Зиннуров белән хушлаштылар
Аны туган ягында, Фома авылында җирләделәр.
Бүген Нурлат районының Фома авылында махсус хәрби операциядә катнашканда һәлак булган Зиннуров Фәнил Әмир улы белән хушлашу мәрасиме узды.
Хушлашу тантанасы Нурлат районы Башлыгы Дамир Ишкинеев һәм Татарстан Экология һәм табигый байлыклар министрының беренче урынбасары Илнур Гобәйдуллин катнашында узды.
"Бүген без якташыбыз Фәнил Әмир улы Зиннуровны соңгы юлга озатабыз. Ул үз илен яклап, хәрби бурычын үтәгәндә һәлак булды. Авыр туфрагы җиңел булсын. Без аны истә тотачакбыз. Һәм сез, авылдашлары да, аны Батыр якташыгыз, чын герой буларак хәтерегездә саклагыз", - диде Дамир Ишкинеев, һәлак булган сугышчының туганнарына чын күңелдән кайгы уртаклашуын белдереп.
Илнур Гобәйдуллин да Татарстан Республикасы һәм Татарстан Республикасы Хөкүмәте исеменнән сугышчының якыннарына, туганнарына һәм авылдашларының кайгысын уртаклашты.
Россия Федерациясе Президенты Владимир Путин Указы белән Фәнил Әмир улы Зиннуров үлгәннән соң Батырлык ордены белән бүләкләнде. Бүләкне Нурлат шәһәре һәм Нурлат районы хәрби комиссары Заһир Абдуллин аның кече энесе Рамилгә тапшырды.
Геройга 56 яшь иде. 2023 елның 3 маенда, РФ Оборона министрлыгы белән контракт төзеп, ул махсус хәрби операциягә киткән. Ул ефрейтор дәрәҗәсендә мотоукчылар батальоны сугышчысы булып хезмәт иткән. 2023 елның 21 сентябрендә һәлак булган.
Авылдашлары әйтүенчә, ул тырыш, ярдәмчел һәм бик кешелекле, оста ташчы, һәр эшне җиренә җиткереп башкарган.