Нурлатта район Башкарма комитеты җитәкчесе вазыйфаларын башкаручы итеп Әсгать Габдуллин билгеләнде
Мондый карарны депутатлар район Советының чираттагы сессиясендә кабул иттеләр.
Бүген Нурлат муниципаль районы һәм Нурлат шәһәре Советларының чираттагы сессияләре узды. Советлар рәисе Дамир Ишкинеев җитәкчелегендәге депутатлар мөһим карарлар кабул иттеләр.
Сессиядә каралган төп мәсьәлә Нурлат районы башкарма комитеты җитәкчесе Зәрринә Сәйфетдинованың вәкаләтләрен вакытыннан алда туктату булды. Дамир Азатович, Башкарма хакимият системасындагы нәтиҗәле эшен билгеләп, Зәрринә Ринатовнага рәхмәтен белдерде, яңа эшендә уңышлар теләде һәм район башлыгының Мактау грамотасын тапшырды. Авыл җирлекләре һәм депутатлар корпусы башлыклары исеменнән Надежда Егорова һәм Алсу Шакирова да җылы теләкләрен җиткерделәр.
Аннары депутатлар Башкарма комитет җитәкчесе вазыйфасына конкурс игълан итү турында Карар кабул иттеләр. Җитәкче вазифаларын вакытлыча Әсгать Габдуллин башкарачак. Ул бүгеннән башлап җитәкченең беренче урынбасары итеп билгеләнде. Әсгать Касыйм улы нурлатлыларга яхшы таныш. Ул 2014 елдан 2018 елга кадәр Нурлат районы Башкарма комитеты җитәкчесе булып эшләде. Җирле үзидарә органнарында бай тәҗрибәсе бар, моңа кадәр Аксубай районының «Аксубай» агрофирмасы директоры булып эшләгән.
Сессияләрдә депутатлар шулай ук «Татарстан Республикасы Нурлат муниципаль районы» муниципаль берәмлеге милкендә булган мөлкәтне хосусыйлаштыруның фараз планы (программасы) турында» 2023 елга район Советы карарына үзгәрешләр кертү, депутатларның, үз вәкаләтләрен даими нигездә гамәлгә ашыручы җирле үзидарәнең сайлап куелган вазыйфаи затларының, контроль-хисап рәисләренең хезмәт хакына чыгымнарны формалаштыру нормативлары турында сорауларны карадылар. Татарстан Республикасы Нурлат муниципаль районы органнары, муниципаль хезмәткәрләре шулай ук «Нурлат муниципаль районының территориаль планлаштыру схемасына” һәм “Муниципаль милекне тапшыру турында” үзгәрешләр кертелде.