Нурлатта чираттагы контрактчылар төркемен хәрби хезмәткә озаттылар
Бүген иртә таңнан Нурлат хәрби комиссариатында махсус хәрби операциядә контракт нигезендә катнашырга теләк белдергән нурлатлыларны озаттылар. Бу юлы 7 кеше Ватан чикләрен якларга китте.
Аларны озатырга һәм үгет-нәсыйхәт сүзләрен җиткерергә район җитәкчелеге килде.
"Сез кыю адым ясыйсыз, чөнки Ватанны саклау – һәр кешенең гражданлык бурычы. Сезгә лаеклы хезмәт итүегезне, исән – сау өйгә әйләнеп кайтуыгызны телим», - дип мөрәҗәгать итте контрактчыларга район Башлыгы Дамир Ишкинеев, аларның һәрберсенә юлда кирәкле әйберләр салынган пакетлар тапшырды.
"Сез китәсез, әмма шуны белегез: туганнарыгыз һәм якыннарыгыз безнең яклавыбыз астында кала. Теләсә нинди сораулар буенча алар район башкарма комитетына яки «Ватанны саклаучылар» фондына мөрәҗәгать итә алалар. Алар өчен борчылмыйча хезмәт итегез», – дип теләкләренә район Башкарма комитеты җитәкчесе, чакырылыш комиссиясе рәисе Зәррина Сәйфетдинова да кушылды. Юлга кузгалучы хәрбиләргә үз теләкләрен шәһәр һәм район хәрби комиссары Заһир Абдуллин да җиткерде.
Район җитәкчелеге карары буенча контрактчылар финанс ярдәме дә алдылар.
"Район җитәкчелеге яклаучыларыбызга һәрьяклап ярдәм итә, шушы көннәрдә аларга финанс ярдәме күрсәтү турында карар кабул ителде. бюджеттан тыш акчалардан, өстәмә рәвештә спонсорлар хисабына, аларга контрактчыларга һәм аларның гаиләләренә ярдәм итү өчен 300 мең сум бүлеп бирәбез», – дип аңлатма бирде Дамир Азатович.
Контракт буенча хезмәт итүчеләр арасында 36 яшьлек Алексей Егоров та бар иде.
"2014 елдан бирле вакыйгаларның барысын да күзәтеп барам, булган хәлләр аркасында җаным урынында түгел иде. Һәм хәзер, безнең дәүләт куркыныч астында булганда, аны якларга, анда безнең солдатларга каршы торучыларга кушылырга, ярдәм итәргә карар кылдым. Без бит Нурлатта барыбыз да дус һәм шулай тәрбияләнгән", - дип уртаклашты ул.
Улларын озатырга иртән Мамыктан Морозовлар да килде.
"Улыбыз Олег махсус операциягә китә, әлбәттә, бик борчылабыз, әмма аның карарын тиешенчә кабул иттек. Көтеп торыйк, дога кылыйк һәм барысы да яхшы булыр дип ышаныйк", - дип уртаклаштылар Владимир һәм Светлана Морозовлар.
Һәм менә алар саубуллашу, кочаклашу һәм тизрәк кайту теләге белән дулкынландыргыч минутлар – Нурлат контрактчылары автобус белән юлга кузгалды. Аллаһы Тәгалә саклап йөртсен!Без сезне көтәбез! Эшлибез, туганнар!- нурлатлылар аларны шундый сүзләр белән озатып калды.