Дамир Ишкинеев Нурлат районының иң яхшы комбайнчыларын бүләкләде
Район башлыгы «Сөләйманов Ә.И.» крестьян-фермер хуҗалыгы игенчеләренә акчалата сертификатлар тапшырды.
Бүген Нурлат районының Биляр-Озеро авылы янындагы басуда беренче булып бер мең тонна яңа уңыш бөртеге суктырган комбайнчыларны хөрмәтләделәр. Традиция буенча, быел да урак өсте лидерлары булып «Сөләйманов Ә.И.» КФХ хезмәткәрләре тора. Мең тонна чиген монда инде 8 экипаж узган. Рәмис Нямаев һәм Тимур Щербаков алда бара, алар 1530 тонна ашлык суктырган. Икенче урында-Илгиз һәм Алсу Әндарҗановларның гаилә экипажы, иң көчлеләр өчлеген Әнәс һәм Әдилә Салаховлар йомгаклый. Бүләкләнүчеләр арасында шулай ук Виталий Богданов һәм Виталий Чернов, Роберт һәм Рәзилә Абдрахмановлар, Тәбрис Садыйков һәм Илдар Закиров, шулай ук Иван Гаврилов һәм Марат Сәлахов та бар.
Урып-җыю лидерларына сертификатларны Нурлат районы Башлыгы Дамир Ишкинеев тапшырды. "Тырышлыгыгыз, фидакарь хезмәтегез өчен зур рәхмәт. Районыбызның барлык хуҗалыкларының урып-җыю эшләрен вакытында башкаруларын, ашлыкны складларга, элеваторларга югалтуларсыз урнаштыруларын телим. Котлыйбыз, Сезгә сәламәтлек телим. Урып – җыюны бәйрәм белән тәмамлаячакбыз», - диде Дамир Азатович, урып-җыю эшләренең югары темпын билгеләп үтте. Бүгенге көндә район буенча бөртеклеләр барлык мәйданнарның 31 процентында җыелган. «Сөләйманов Ә.И.» КФХсында басуларда тәүлек әйләнәсе 16 комбайн эшли, уртача уңыш 40 центнер тәшкил итә.
Район башлыгының җылы сүзләрен агитбригада әгъзаларының – район артистларының чыгышлары тулыландырды. Алар комбайнчыларга иң матур концерт номерларын бүләк итте.