Мордовиядә узган республика Сабан туенда Татарстан Республикасын Нурлат районы лаеклы тәкъдим итте
Ләмбрә районы Аксеново авылыннан ерак түгел урнашкан майданда узган XVI Республика милли-фольклор Сабан туе бәйрәмендә 200ләп нурлатлы катнашты.
Нурлатлылар Сабан туе мәйданында үз мәйданчыкларын төзеделәр. Мәйданчыкның үзәген ерактан кунакларның игътибарын җәлеп иткән нурлы Нурлат атының топиарие бизәде, күпләр безнең район символы янында истәлеккә фотога төшәргә ашыктылар. Биредә Нурлат эшкуарлары, шәхси ярдәмче хуҗалыклар, үзмәшгульләр тәкъдим иткән милли ризыкларны, яшелчәләрне, сөт һәм ит продукциясеннән авыз итәргә мөмкин иде. Янәшәдә Нурлат осталары бәйрәм кунакларын милли курчаклар, сувенирлар, чүлмәк, балчык эшләнмәләре ясау буенча мастер-классларга чакырдылар.
Мордовия Республикасы башлыгы Артем Здуновны, Татарстан Экология һәм табигый байлыклар министры Александр Шадриковны һәм Нурлат ишегалдындагы башка хөрмәтле кунакларны Нурлат районы Башлыгы Дамир Ишкиниев каршы алды. Нурлат кызлары кунакларны чәк-чәк һәм икмәк белән сыйладылар, шулай ук милли түбәтәйләр бүләк иттеләр.
Нурлатлылар Сабантуйның төп сәхнәсендә тәкъдим ителгән бәйрәм программасына кабатланмас колорит һәм якты төсләр керттеләр. Дамир Ишкиниев күпмилләтле Нурлат районы исеменнән Мордовия халкын сәхнәдән котлады.
"Сабан туе бәйрәме төрле милләт кешеләренең хезмәт, туганлык һәм дуслык символы булды һәм шулай булып кала һәм без республикабызда һәм Россия Федерациясендә барлыкка килгән бу гасырлар буе дәвам иткән гореф-гадәтләрне, тынычлыкта һәм татулыкта яшәүне бик кадерлибез. Бүгенге көндә татар җәмгыятьләре һәм башка күп кенә милли мәдәни оешмаларның Мордовия территориясендә барысы да тыныч һәм тату яшәсен өчен бер максат белән эшләвен күрү бик күңелле. Халыкларыбызның мәдәниятләре үзара баетылсын һәм барыбызны да көчлерәк итсен», – дип билгеләп үтте Дамир Азатович.
ТР атказанган мәдәният хезмәткәре Ольга Ильина җитәкчелегендәге «Эсперанса» эстрада бию ансамбле чыгышлары, җирле үзешчән артистлар бәйрәмнең якты бизәге булды. Популяр артист Фирдүс Тямаевның чыгышы да чын бүләк булды. Якташыбыз чыгыш ясаганда көчле яңгыр яуса да, тамашачылар җырладылар һәм күңелле биеделәр.
Мордовиянең Республика Сабантуенда спорт мәктәпләре коллективлары катнашты, алар спорт һәм милли уеннар оештырды. Нурлат көрәшчеләре көрәш мәйданында үз көчләрен һәм җитезлекләрен күрсәтте. Берничә тапкыр Сабан туе чемпионы Илфат Гыймадиев абсолют батыр булып калды һәм төп призны яулады.