Нурлат районы ЮХИДИ бүлегендә балалар өчен экскурсия узды
Урта Камышлы мәктәбенең мәктәп яны лагерена йөрүчеләр юлда тәртип сакчылары янында кунакта булдылар.
Экскурсия башында һәр балага файдалы бүләкләр – яктылык кайтаручы элемент һәм дәфтәр таратылды. Очрашу барышында инспекторлар балаларны административ законнарны үтәү һәм теркәү-имтихан бүлекчәләре эше белән таныштырдылар. Укучыларны юл хәрәкәте кагыйдәләрен белүләрен тикшерделәр һәм үзләре дә аларның күпсанлы сорауларына җавап бирделәр.
"Гадәттә без үзебез мәгариф учреждениеләрендә чаралар үткәрәбез, ә монда балалар үзләре безгә кунакка килделәр. Мондый чараның форматы балаларга юлларда куркынычсызлык тәэмин итүнең катлаулы мәсьәлә булуын аңларга мөмкинлек бирә. Ә алар, бу процесста катнашучылар буларак, моңа һәрьяклап ярдәм итәргә тиеш. Юл хәрәкәте кагыйдәләрен үтәргә, яшь юл хәрәкәте инспекторлары хәрәкәтендә катнашырга, яшьтәшләренә кагыйдәләрне өйрәнергә ярдәм итәргә», – ди Нурлат шәһәрендә БДД ДБУ ТУ профилактика бүлеге башлыгы Гөлфия Гыймалтдинова.
Техник карау станциясендә балаларга тормоз системасын тикшерүнең ничек башкарылуын күрсәттеләр. Куркынычсызлык максатларында һәр машина техник яктан төзек булырга тиеш. Балаларда патруль машинасы белән танышу зур кызыксыну уятты. Инспектор ялтыравык маякларның һәм тавыш бирү җайланмасының эшен күрсәтте. Теләге булганнар салонда утырып, үзләрен тәртип сакчысы итеп хис итә алдылар.
"Экскурсия миңа бик ошады, кызык булды. Мин үзем велосипедта йөрим һәм һәрвакыт юл хәрәкәте кагыйдәләрен үтим», – дип тәэсирләре белән уртаклашты Урта Камышлы мәктәбе укучысы Кристина Илеверова.
Яхшы кәеф һәм яңа белем белән балалар өйләренә кайттылар. Аларның кайберләре киләчәктә Дәүләт автоинспекциясе хезмәткәре булырга теләк белдергән.