Нурлат җылылык челтәрләре яңа сезонга әзерләнә
Шәһәр һәм район котельныйларында ремонт - профилактика эшләре алып барыла.
Ел саен кышкы җылыту сезоны тәмамланганнан соң районның җылылык челтәрләре чираттагысын әзерләүгә керешә: документлар әзерләнә, килешүләр төзелә, предприятие операторларын һәм хезмәткәрләрен укыту башлана, 3 ай эчендә 33 км җылылык трассасын тикшерергә, 41 эре һәм мини-котельнаяда ремонт-профилактика эшләре үткәрергә, ягъни кайдадыр трассалардагы тузган торбаларны чистартырга яки алыштырырга кирәк, йозакларны ремонтлау яки тулысынча үзгәртү, приборлар әзерләү, насослар суырту, төтен юлларын чистарту һәм вентиляторларны чистарту кебек эшләрне эшләп өлгерергә кирәк.
Предприятиенең баш инженеры Мансур Камалетдинов билгеләп үткәнчә, җиһазларга, приборларга, хәтта буяу материалларына бәяләр кыйммәтләнү сәбәпле, предприятиенең шактый катлаулы финанс хәлен исәпкә алып, искесен күбрәк ремонтлау таләп ителә. “Кайбер кыенлыклар булса да, без кулланучыларга тотрыклы җылылык бирүне гарантиялибез", - дип ышандырды Мансур Имамович.
Шәһәрдә иң зур булган 1нче котельный мастеры Наил Мирзанов сүзләренчә, җәйге чорда операторлар слесарь буларак та хезмәт куялар.
Җылылык бирү объектларында эшләрнең бер өлеше инде башкарылган. "Без үзебезгә йөкләнгән җаваплылыкның бөтен дәрәҗәсен аңлыйбыз. Шәһәрдә яшәүчеләрдән шикаятьләрне бик сирәк алабыз. Киләчәктә алар булмаячак дип өметләнәбез", - диде Наил Габделбәр улы.
Җылылык челтәре хезмәткәрләренең йорт хуҗаларына, җылылыкны кулланучыларга да теләкләре бар – коммуналь хезмәтләр системасы хезмәткәрләренә генә таянмаска, ә кышкы сезонга алдан әзерләнергә: өйдә җылы һәм уңайлы булачак, өстәвенә, тәрәзәләрне, ишекләрне җылытып кына калмыйча, торбаларда һәм батареяларда суның нормаль әйләнешен контрольдә тотарга да азрак түләргә туры киләчәк. Хәтта шундый кечкенә -дөрес сайланган кран да су агымын көйләү проблемасын бетерә ала.