Нурлатта хәрби хезмәткә чакырылучылар көнендә булачак Ватанны саклаучыларны хөрмәтләделәр
Традиция буенча Нурлатта чакырылыш кампаниясе кысаларында хәрбиләр катнашында тантаналы чаралар уза. Бу чакырылыш та моңа охшаш. Бүген, 28 апрельдә, шәһәр Мәдәният Сараенда тантаналы чара узды. Биредә бу язда РФ Кораллы Көчләре сафларына вакытлы хәрби хезмәткә чакырылучы егетләр, аларның әти-әниләре җыелды, шулай ук мәктәп укучылары катнашты. Шәһәр мәктәпләре, мәдәният сарае фойесында, шулай ук «Киләчәк» үзәге хәрби-патриотик тематика күргәзмәләре тәкъдим итте.
Концерт залында җыелганнарны район Башкарма комитеты җитәкчесе вазыйфаларын башкаручы Радик Гыйниятуллин сәламләде.
"Кораллы Көчләрдә хезмәт итү – һәр ир-ат биографиясендә мөһим этап. Монда сез яхшы тормыш мәктәбен генә түгел, чын дуслар да табарсыз, физик һәм рухи яктан ныгырсыз», – дип мөрәҗәгать итте ул чакырылучыларга, аларның актив гражданлык позициясе һәм кыюлыгы өчен, ә ата-аналарга Ватанның лаеклы улларын үстергән өчен рәхмәтен белдерде. Монда ук Радик Габдулла улы мәктәп укытучыларына, шулай ук «Киләчәк» үзәге балалар театрының волонтерлар үзәгенә Нурлат районында үсеп килүче буынны хәрби-патриотик тәрбияләүдә намуслы хезмәтләре өчен Мактау грамоталары тапшырды. Шулай ук сәхнәдә «Хезмәткә һәм оборонага әзер» Бөтенроссия физкультура-спорт комплексының билгеләре тапшырылды.
Үзәк хәрби округ инспекторы, запастагы генерал-майор Анатолий Молоствов, Нурлат шәһәре һәм Нурлат районы хәрби комиссары Заһир Абдуллин, Әфганстандагы сугыш һәм башка локаль конфликтлар инвалидларының Татарстан Республика иҗтимагый оешмасының Нурлат районы бүлеге рәисе Ришат Сафиуллин хәрби хезмәткә чакырылучыларга үгет-нәсихәт сүзләрен һәм сәхнәдән яхшы теләкләрен җиткерделәр.