Халыкара конкурста катнашу нурлатлыларга уңыш китерде
Нурлатлылар быел да «Гаиләнең даны сәхифәләре» халыкара интернет-конкурсында Ватанга тугры хезмәт итү үрнәген күрсәткән якташлары турындагы иҗади эшләре белән катнашып, призлы урыннар алды.
Литталар гаиләсе әгъзалары берьюлы өч номинациядә уңыш казанды: Маргарита Валерьяновна – I, уллары Игорь, Лениногорск нефть техникумының 3 курс студенты һәм Вячеслав, 3 нче мәктәпнең 6Б сыйныф укучысы, II урынга лаек булдылар.
Вячеслав Литтаның фәнни җитәкчеләре-3 нче мәктәп педагоглары Ирина Романова һәм Ольга Душенькина «Укытучы-остаз»дипломнарына лаек.
«Нурлат-информ» иҗат хезмәткәрләренең Бөек Ватан сугышы елларында дошманга каршы фронтта һәм тылда батырларча көрәшкән якташлары турындагы эшләре дә югары бәяләнгән: II һәм III урыннарны Гүзәл Садыйкова һәм Лилия Мөбарәкшина алды.
Быел конкурс Сталинград сугышында Җиңүнең 80 еллыгына багышлап үткәрелде. Бүләкләү тантанасы май аенда Мәскәүдә илкүләм медиафорум кысаларында узачак.