Нурлатта Коръән укучылар конкурсы узды
Балалар арасында традицион конкурс Әхмәтзәки хәзрәт Сафиуллин исемендәге мәгариф үзәгендә оештырылды.
Балаларның белемнәрен 15 яшькә кадәрге дүрт яшь категориясендә тикшергәннәр. Малайлар һәм кызлар арасында яңа гына дини аятьләрне өйрәнә башлаган һәм курсларда тырышып шөгыльләнгән һәм билгеле нәтиҗәләргә ирешкән балалар да булган. Мәсәлән, 14 яшьлек Айзат Касымов Коръән сүрәләрен өйрәнү белән Коръән-хафиз Исфандияр Аброров җитәкчелегендәге түгәрәктә икенче ел шөгыльләнә. Әмма моңа да карамастан, яшүсмер 1 җүзны белә, ә бу 35 сүрә тирәсе.
"Башта без гарәп хәрефләрен өйрәнәбез һәм «Мөәллим сани» китабы буенча укырга өйрәнәбез, шуннан соң гына сүрәләрне ятлауны кабул итәбез. Мин аларга мәгънәсен аңлатам, тәрҗемә итәм. Хәзерге вакытта Коръән сүрәләрен ятлау курсларына 5-18 яшьлек 25 малай йөри", - дип уртаклашты Исфәндияр Аброров.
Балалары өчен җан атарга әти-әниләре, әби-бабайлары да килгән. Әйтик, Нурлат егете Нәфис Шәкуровның конкурста 8 яшьлек улы Ислам һәм 5 яшьлек кызы Нәзилә катнашты. Балалар намаз укыйлар, 6 сүрә беләләр, нигездә, ата-аналар җитәкчелегендә белем алалар, улы шулай ук «Миннегөл» мәчете каршындагы курсларга йөри.
"Балаларда кечкенәдән дини кыйммәтләр тәрбияләү бик мөһим. Болар барысы да аларны олыларга хөрмәт белән карарга өйрәтә, әхлак тәрбияли», – дип уртаклашты гаилә башлыгы.
Нурлат районы мөхтәсибе Ирек хәзрәт Сафиуллин билгеләп үткәнчә, елдан-ел Коръән укучылар конкурсында катнашучылар саны арта бара. Быел, мәсәлән, 200 дән артык бала үз белемнәрен сынап карарга килгән. Алар барысы да спонсорлардан татлы бүләкләр алдылар. Җиңүчеләргә һәм призерларга кыйммәтле бүләкләр тапшырылды. Ә белемнәрен тикшергәннән соң һәм бүләкләү тантанасыннан соң барысын да мул итеп әзерләнгән табыннар көтә иде