Нурлатта нәсел шәҗәрәләре фестивале узды
«Гаилә тарихында - Гасырлар кайтавазы» фестиваленең муниципаль этабында 3 гаилә командасы катнашты.
Конкурсның беренче этабы кысаларында шәһәр Мәдәният сарае фойесында күргәзмәләр оештырылды, анда катнашучылар үзләренең шәҗәрә агачларын – буыннан-буынга тапшырыла торган гаилә истәлекләрен, милли ризыклар һәм эчемлекләрне тәкъдим иттеләр, халык традицияләре турында сөйләделәр. Әйтик, Иске Чаллы авылыннан Захаровлар гаиләсе әгъзалары, токымнар истәлегенә сакчыл сакланган күп санлы борынгы предметлар белән беррәттән, фестивальгә борынгы көзге дә алып килгәннәр.
"Гаиләнең бу ядкарен без бик кадерләп саклыйбыз, буыннан – буынга тапшырабыз», - дип сөйләде Ольга Рудакова.
Нурлаттан Мингазовлар-Сатдаровлар гаиләсе жюри әгъзаларын матур итеп бизәлгән шәҗәрәсе белән таныштырды, ул биш буын вәкилләрен берләштерә икән. Ә Кизләүдән Минхаеровларның зур гаиләсе татар милли ризыкларын тәкъдим итте: урама, бәлеш, чәк-чәк һәм башкалар.
Фестивальнең икенче этабы Мәдәният сарае сәхнәсендә узды. Монда һәр команда үзенең визит картасын тәкъдим итте "Минем гаиләм, минем нәселем!"аның кысаларында үз шәҗәрәсен матур концерт программасы белән тәкъдим итте.
Фестивальдә катнашучыларны һәм тамашачыларны район Башкарма комитеты җитәкчесе Зәрринә Сәйфетдинова сәламләде. Ул фестивальнең Татарстан Республикасы территориясендә яшәүче һәр халыкның милли һәм гаилә традицияләрен саклаудагы мөһим ролен билгеләп үтте.
Нурлатлыларның чыгышын Казаннан килгән мәртәбәле жюри бәяләде.
"Нурлатта нәсел шәҗәрәсе фестиваленең муниципаль этабында без беренче тапкыр булдык һәм бездә бары тик иң уңай эмоцияләр генә. Гаиләләрнең архивларны күтәрүе, үз нәселләрен хәтерләве һәм белүе сөендерә. Барлык коллективлар музыкаль яктан да, артистлык планында да, документларны кадерләп саклаулары буенча да хөрмәткә лаек», - дип уртаклашты жюри рәисе, югары сәнгать мәктәбе факультетының өлкән укытучысы Александр Козлов.
Ике этап нәтиҗәләре буенча Захаровлар гаиләсе җиңү яулады. Алар 4 апрельдә Әлки районында узачак фестивальнең зона этабында Нурлатны тәкъдим итәчәк.
Мингазовлар -Сатдаровлар гаиләсе икенче, өченче урында - Минхаеровлар гаиләсе.
Җиңүчеләрне һәм призерларны сәхнәдә котладылар, Зәрринә Сәйфетдинова һәм Александр Козлов аларга дипломнар һәм акчалата сертификатлар тапшырдылар.
«Гаилә тарихында гасырлар кайтавазы – тарихта без эзлебез» фестивале быел бишенче тапкыр үткәрелә.