Марат Әхмәтов Нурлатта яңа йортка күченүчеләргә ачкычлар тапшырды
Нурлатта «Татнефть» хезмәткәрләре өчен социаль ипотека программасы буенча төзелгән 30 фатирлы торак йорт тапшырылды.
Нурлатта яңа фатирларга күчүчеләргә ачкычлар тапшыру тантанасында ТР Дәүләт Советы Рәисе урынбасары Марат Әхмәтов, ТР Дәүләт Советының Бюджет, салымнар һәм финанслар комитеты рәисе урынбасары Камил Нугаев, РФ Дәүләт Думасы депутаты Айдар Метшин, ТР Дәүләт Советы депутатлары Шамил Яһудин, Рәис Сөләйманов, «Татнефть» ГАҖ социаль программаларны алып бару үзәге җитәкчесе Максим Семенов һ. б.катнашты
«Республикабыз Президенты Рөстәм Нургали улы Миңнеханов ярдәме белән бик күп программалар тормышка ашырыла, һәм безнең район аларның барысында да диярлек катнаша, без бик күп социаль объектлар ачабыз", – диде Алмаз Әхмәтшин, агымдагы елда районда кертелгән конкрет программаларга тукталып. Шунда ук ул кече нефть компанияләре, «Татнефть»нең яңа фатирларга күчүчеләрен дә котлады.
Марат Әхмәтов та яңа йортка күчүчеләр адресына котлау сүзләрен җиткерде. «Әгәр торакка ихтыяҗ бар икән, димәк, торак пунктның да перспективасы бар. Нурлат үсә һәм яшәрә. Биредә нурлатлыларның уңайлы яшәү өчен барлык шартлар да бар", - диде Марат Готыф улы, Нурлатка килүенең һәрчак уртак шатлык өчен сәбәп барлыгын яшермичә.
Бу көнне Ришат һәм Алия Җәләловларның яшь гаиләсе дә яңа өч бүлмәле фатир ачкычларын алды. Алар икесе дә «Татнефть»системасында эшли. "Моңа кадәр без бер бүлмәле фатирда яшәдек. Бүген безнең өчен үзенчәлекле көн. Фатир иркен һәм торак өчен тулысынча әзер, хәтта ремонт та кирәк түгел. Иң мөһиме-хәзер кызыбызның үз бүлмәсе булачак, ул моңа бик шат», – дип уртаклашты яшь әти-әни мөхтәрәм кунакларны яңа фатирга чакырып.