Нурлатта республика мөселман командалары арасында мини-футбол буенча турнир узды
Ярышлар Идел буе Болгар дәүләтендә ислам динен кабул итүгә 1100 ел тулуга багышланган иде.
"Тулпар" спорт сараеның футбол кырында 6 команда очрашты, алар арасында Болгар ислам академиясе студентлары да бар иде. Турнир алдыннан чарада катнашучыларны һәм кунакларны район имам-мөхтәсибе Наил хәзрәт Әбелханов сәламләде. Ул республика мөфтие Камил хәзрәт Сәмигуллин исеменнән дә тынычлык һәм хәер-фатиха теләкләрен җиткерде.
"Нурлат районы Башлыгы Алмаз Сәлим улы Әхмәтшинга һәм" Тулпар" спорт сарае дирекциясенә ярышларны оештыруда ярдәмнәре өчен чын күңелдән рәхмәт белдерәбез", – диде Наил хәзрәт.
Футбол кырында турнирның төп трофее Кубок өчен көрәш бик киеренке барды, барлык командалар да, шул исәптән нурлатлылар да яхшы уен күрсәтте. Аксубай мөхтәсибәте командасы җиңү яулады.