Нурлатның 3нче мәктәбендә янгын вакытында үзеңне дөрес тоту кагыйдәләре буенча өйрәнүләр узды
Нурлатның 3нче мәктәбе базасында ашыгыч хезмәтләр катнашында шартлы рәвештә чыккан янгынны сүндерү буенча планлы күнегүләр-тактик өйрәнүләр уздырылды.
Өйрәнүләрне Россия гадәттән тыш хәлләр министрлыгының ТР буенча Баш идарәсенең 125 ПЧ 11 ПСО ФПС ГПС идарәсе башлыгы эчке хезмәт майоры Евгений Попов җитәкләде. Анда Нурлат шәһәренең 3нче урта мәктәбенең мәктәп укучылары һәм педагогик составы, 125 һәм 73 нче янгын сүндерү, коткару бүлекләре хезмәткәрләре, шулай ук полиция, ашыгыч ярдәм, газ һәм электр челтәрләре хезмәте күрсәтү экипажлары катнашты.
Сигнал буенча барысы да эвакуация планы буенча мәктәп бинасыннан эвакуацияләнде. Махсус хезмәтләр килгәннән соң, бинада шартлы янгын чыганагын бетерү өчен кирәкле чаралар башкарылды.
Укучылар өчен дә, коткару хезмәтләре өчен дә гадәттән тыш хәл килеп туганда, тиз реакция күнекмәләрен камилләштерү өчен өйрәнүләр үткәрелде, дип хәбәр ителә социаль челтәрләрдәге мәктәп сәхифәсендә.