Нурлат районының Кәкре Атау авылында авылдашлар очрашуы узды
"Шәйдулла бабайның оныклары" – авылда туып-үскән, читтә яшәүче туганнары, балалары, оныклары һәм хәтта оныкчыклары белән очрашулар әнә шундый исем астында уза.
Узган якшәмбедә дә бу зур һәм тату гаиләнең йөздән артык вәкиле Кәкре Атау авылында Чирмешән елгасы буенда җыелды. Табигать кочагында ял итү, республиканың төрле шәһәрләреннән килгән туганнары белән аралашу, гаилә тарихын искә алу, дөньядан киткән башка туганнарны искә алу... Нәкъ менә моның өчен инде өченче ел рәттән оештыручылар әлеге очрашуны үткәрә, быел исә Нурлат җирендә беренче тапкыр узуы белән игътибарга лаек. Ә очрашу Коръән сүрәләрен укудан башланды, алар анда иң яшь катнашучыларның берсе Хәмзә Әһлиуллин авызыннан яңгырады.
«Бер очрашу-бер гомер кебек. Без ел саен җыелабыз, балалар һәм оныклар белән киләбез, аларга татар халкының мәдәнияте, дини кыйммәтләре турында сөйлибез, балаларны туган телдә аралашырга өйрәнәбез. Мондый очрашуларга күпләрнең килү мөмкинлеге табуы куандыра", - дип уртаклашты чараның инициаторларының берсе якташыбыз, Тукай районы фермерлар ассоциациясе башлыгы Минталип Миңнеханов. Хатыны Рәмзия ханым белән бергә алар җыелганнарга садака өләштеләр, шуннан соң барысы да Аллаһы Тәгалә ризалыгы өчен дога кылдылар.
"Шәйдулла бабайның балалары күп бит, күпләр таралышты, аралашудан туктады. Моның өчен без өч ел элек Яр Чаллыда узган беренче очрашуны оештырырга булдык. Ул вакытта аңа 170 кеше килгән иде. Быел аны Нурлат районында үткәрергә уйладык. Алдан ук әзерлек эшләрен башлап җибәрдек, барысын да бергә эшләдек: чатырлар да урнаштырдык, өстәлләр дә көйләдек», – дип сөйләде Илназ хәзрәт Яхин, оештыручылар арасында ул инде өченче ел рәттән чыгыш ясый.
Минталип Миңнеханов-безнең якташыбыз, ул үзенең намуслы хезмәте белән республиканың азык-төлек иминлегенә зур өлеш керткән. Ул кәкре атаулыларны дә яхшы эшләре белән сөендерә: әйтик, быел аның спонсорлык ярдәме белән мемориаль комплекс территориясендә Бөек Ватан сугышы елларында Җиңү өчен көрәшкән якташлары истәлегенә тагын 70 авылдашларының исемнәре кергән яңа мемориаль плитәләр урнаштырдылар. Бу юлы да кече ватанына кайтуының беренче көнендә үк ул беренче чиратта мемориаль комплекста булды, догалар укыды.
ТР атказанган мәдәният хезмәткәре, җирле автор, якташыбыз Илдус Диндаровның Минталип Миңнеханов турындагы китабын тәкъдир итү дә очрашуга кайтучылар өчен көтелмәгән сөенеч булды.
Очрашу кызыклы әңгәмәләр, дини темаларга сөйләшүләр, туган телне, татар халкының мәдәниятен саклау кирәклеге, күмәк намазлар белән дәвам итте. Ә ахырда барлык кунаклар да мондый очрашуларны традицион итәргә теләк белдерделәр.