Нурлаттан бер төркем ир-егет Украинага китте
Бүген, 15 июльдә, Нурлатта Украинадагы махсус операциядә контракт буенча хезмәт итәргә теләк белдергән өч ир-егет Казанга юл алды.
Аларны изге теләкләр белән озатырга һәм хәер-фатихасын бирергә Нурлат шәһәре һәм Нурлат районы хәрби комиссары Заһир Абдуллин, Нурлат районы башлыгы урынбасары Линар Маняпов, сугышчан туганлык, Нурлат благочиниесе вәкилләре килгән иде.
«Бу бөтен ил өчен авыр вакытта бу егетләр үз теләкләре белән Безнең Ватан мәнфәгатьләрен якларга карар кылдылар. Район җитәкчелеге, барлык нурлатлылар исеменнән, безнең район башлыгы Алмаз Сәлим улы Әхмәтшин исеменнән Сезгә патриотлык, кулга корал алып, үз гаиләгезне, ватандашларыбызны, илебез гражданнарын яклаганыгыз өчен зур рәхмәт белдерәм», – дип мөрәҗәгать итте Линар Нурисламович ирекле-контрактчыларга.
Аларга изге теләкләр белән хәрби комиссар Заһир Абдуллин да мөрәҗәгать итте.
«Бүген без солдатларыбызны озатабыз. Үзегезне саклагыз, лаеклы хезмәт итегез, ә без барыбыз да сезне исән – сау килеш кайтуыгызны көтеп калабыз», - диде ул.
Нурлатның хәрби туганлык берләшмәсе вәкилләре, сугышчан хәрәкәтләр ветераннары Марат Абдрахманов һәм Ришат Сафиуллин да контрактчыларга үз теләкләрен җиткерделәр. Аларга Ильинский чиркәве настоятеле иерей Александр Кузьмин да үз хәер - фатихасын бирде.
«Бу карарны мөстәкыйль кабул иттем, Ватаныбызны яклаячакмын. Көн саен яңалыклардан безнең егетләрнең дошман белән ничек көрәшүләрен тыңлап барабыз. Мин үз вакытында хәрби хезмәтне Владикавказда уздым", - дип фикерләре белән уртаклашты Нурлаттан Василий Яллин. Аны озатырга зур һәм тату гаиләсе килгән: хатыны Мәдинә, кызлары Василиса һәм Эвелина, кечкенә улы Данил, тормыш иптәшенең әти-әнисе.
“Аның Украинага бару карарын тиешле дәрәҗәдә кабул иттек, әлбәттә, кайтуын түземсезлек белән көтәбез, исән – сау кайтып кайтсын өчен дога кылачакбыз", - диде хатыны Мәдинә.
Василий Яллин белән бергә 23 яшьлек Семен Михальчин һәм 49 яшьлек Иван Молоткин контракт буенча хезмәт итәргә китте. Хәрби комиссар мәгълүматларына караганда, бүген алар Казанның танк училищесына юл ала, ә аннан контрактчылар Оренбург өлкәсенә укырга барачак. Бер айдан алар Украинага юл тотачак.
Элегрәк, 8 июльдә, Украинага контракт буенча хезмәткә Нурлаттан тагын бер егет Рафис Камалетдинов киткән иде.