Нурлат районында дүшәмбедән башлап «Мобиль сырхауханә» үз эшен башлап җибәрде
Ул «Сәламәтлек саклау» һәм «Демография» милли проектлары кысаларында авыл халкын диспансерлаштыру өчен эшләгәнгән.
Беренче булып күчмә медицина ярдәменең бөтен уңайлыкларын үз өстендә сынап карарга Чулпан һәм якын-тирә торак пунктларда яшәүчеләргә насыйп булды.
Чулпан участок хастаханәсе территориясендә җанлылык хөкем сөрде: КАМАЗ базасында урнашкан озын мобиль комплекс янында авыл халкы белгечләрне кабул итүгә чират көтте. Биредә аларны Әлмәттән табиблар бригадасы көтте: офтальмолог, ЛОР, гинеколог, уролог, кардиолог, эндокринолог, алар үзләре белән анализлар кабул итү өчен күчмә лаборатория, ЭКГ һәм УЗИ кебек тикшеренүләр үткәрү өчен аппаратура алып килделәр.
- Табибларның безгә килүләре бик уңайлы, чөнки һәрвакыт та шәһәргә бару мөмкинлеге булмый. Бүген эндокринолог, кардиологтан кабул итте, шунда ук анализлар бирдем, табиблар дәвалауны да билгеләде. Мондый мобиль сырхауханә табиплары каравын оештырганнары өчен республика җитәкчелегенә рәхмәт, – дип уртаклашты Елаурда яшәүче Галина Кульметьева.
– Безнең хастаханәгә 4 меңнән артык пациент беркетелгән. Аларның барысы да тикшерү узу өчен район үзәгенә бара алмый. Мондый мобиль поликлиника да авыл халкы өчен бик уңайлы. Моңа кадәр башка медицина учреждениеләрендә тикшерү узган кешеләр дә кабат консультация сорап киләләр, - Чулпан хастаханәсенең участок терапевты Гөлфия Мусина.
Шунысын да әйтергә кирәк, авыл кешеләренә уңайлы булсын өчен, биредә аларны алып килүне дә оештырганнар: Нурлат район үзәк хастаханәсе һәм районның социаль яклау бүлеге бүлеп биргән ярдәм белән алар мобиль поликлиникага барып, кире кайталар. Фельдшер Любовь Ларионова белән бергә бирегә Красномайскидан 76 яшьлек Вера Герасимова да килгән.
- Табиблар киләсен белгәч, шунда ук язылдым. Кичә барлык анализларны да тапшырдым, УЗИ уздым, бүген табибларга кабул итүгә эләгәсем килә. Безгә бару кыенрак бит, ә монда сырхауханә үзе безгә килде, ә иң мөһиме – бушлай бит, – дип сөйләде Вера Ивановна.
Ә мобиль сырхауханә гадәттәгесеннән күләме белән генә аерыла: керү юлында – регистратура, анда пациентларга амбулатор карта бирелә, ике яктан да – табиб һәм бер пациентка исәпләнгән кабинетлар белән коридор. Биредә кабул итү барышында без офтальмолог Кобилжон Джумаев белән әңгәмә кордык.
- Бүген төшкә кадәр мин 30лап кешене кабул итәргә өлгердем. Күз басымын тикшерәбез, изометрия, офтальмоскопия һәм башка тикшеренүләр үткәрәбез, күзлеккә рецептлар язабыз һәм башкалар.
Бердәнбер, без операциягә юллама бирмибез, - дип билгеләп үтте яшь табиб, мобиль поликлиника составында ул республиканың Сарман һәм Бөгелмә районнарында булырга өлгергән.
Нурлат районы үзәк хастаханәсендә билгеләп үтүләренчә, «Мобиль поликлиника» проекты белгечләре республикада ул инде 3 ел гамәлдә булса да, мәкерле чикләүләр белән бәйле рәвештә безнең районга беренче тапкыр гына килгәннәр. Тәгәрмәчле сырхауханә үз эшен район торак пунктларында 2 сентябрьгә кадәр дәвам итәчәк, аларның һәркайсына билгеле бер көннәр беркетелгән. Димәк, авыл кешеләренә вакыт табарга һәм табибларның күчмә бригадасына барырга кирәк, чөнки профилактика – авыруны алдан кисәтүнең иң яхшы ысулы.