Нурлат районы мәчетләрендә Корбан гаете уңаеннан бәйрәм намазы узды
Бүген бөтен дөнья мөселманнары ислам диненең иң зур бәйрәмнәренең берсе-Корбан бәйрәмен билгеләп үтә. Нурлат районының барлык 42 мәчетенә дә иртәнге өченче яртыдан ук дин тотучылар агыла башлады.
Нурлат шәһәренең үзәк мәчетенә 11 яшьлек Билал Корбанов беренчеләрдән булып килде. Кече яшьтән үк әтисе белән бәйрәмне догалар укып каршы ала, дини бәйрәмнәр вакытында гына түгел, җомга көннәрендә дә намазга йөри.
"Бөтен гаиләбез белән бу бәйрәмне түземсезлек белән көтеп алабыз, аны зур итеп уздырабыз, корбан чалу йоласын башкарабыз, сыйлар әзерлибез, – дип уртаклашты әтисе Рөстәм Корбанов. Гаиләдә өч бала үсә, һәм ул балаларны кече яшьтән дини кыйммәтләргә өйрәтүнең мөһимлеген билгеләп үтте.
Мәчеттә бәйрәм гыйбадәте Коръән аятләре укудан башланды. Аннан соң район имам-мөхтәсибе Наил хәзрәт Әбелханов мәхәллә кешеләрен бәйрәм белән котлады, вәгазь укыды. Мөселманнарга мөрәҗәгатендә ул дини бәйрәмнең чишмә башы, корбан чалу йоласы, рухи кыйммәтләр, аз тәэмин ителгән кешеләр файдасына игелекләрнең мөһимлеге турында сөйләде, кешенең үз гамәлләре, чын иман һәм изге ниятләре өчен җаваплылыкны ассызыклады.
Район башлыгы Алмаз Әхмәтшин исеменнән аның урынбасары Линар Маняпов нурлатлыларны Бөек Корбан бәйрәме белән котлады.
Гыйбадәт бәйрәм намазы белән тәмамланды, шуннан соң гаеткә килгән халык Корбан чалырга таралышты.
«Ел саен йоланы үтибез, - дип фикерләре белән уртаклашты шәһәрдәшебез Фәнис Мәсәлимов. - Безнең гаилә зур-өч кыз, өч онык. Быел ике сарык чалабыз".
Корбан чалу өч көн дәвам итәчәк.
« Йола буенча корбан итен өч өлешкә бүләргә кирәк, - диде Наил хәзрәт Әбелханов. - Бер өлешне үзеңә калдырасың, берсен – туганнарына бирәсең яки аш-су белән сыйланып аш пешерәсең, калганнарын мохтаҗларга өләшәсең. Әмма иң яхшысы, әлбәттә, аз тәэмин ителгән кешеләргә тулысынча сәдака итеп таратырга кирәк. Район мөхтәсибәте бу вазифаны үз өстенә ала, итне туңдыру һәм саклау өчен бөтен мөмкинлекләр дә бар. Бер өлешен үзәкләштерелгән тәртиптә мохтаҗ кешеләргә һәм гаиләләргә тапшырабыз, бер өлеше шәһәр үзәгендә Әхмәдзәки хәзрәт Сафиуллин исемендәге белем бирү үзәге бинасында урнашкан ризык тарату пункты аша әзерләячәкләр һәм таратачаклар".
Нурлат шәһәренең «Миннегөл» мәчетендә бәйрәм намазыннан соң 100 дән артык кеше мул табын артына җыелды. Биредә халык иганәсе хисабына бәйрәм сыйлары әзерләнгән, казанда хуш исле пылау пешерелгән, өстәл тәм-томнан сыгылып тора.
«Елга ике тапкыр-Ураза һәм Корбан гаетендә, традиция буенча, гыйбадәттән соң мәхәллә кешеләрен генә түгел, барлык теләүчеләрне дә сыйлыйбыз», – дип уртаклашты мәчет хезмәткәре Зөлфия Моратханова. Аның эш көне, мәчет коллективы кебек үк, бүген төнге 01.00дән үк башланды.
Мәчетнең имам-хатыйбы Рушан хәзрәт Сәлахов сүзләренә караганда, гыйбадәткә йөрүче нурлатлыларның саны елдан-ел арта бара, бу сөендерә, гаиләләр, хәтта кечкенә балалары белән дә килә. Нурлаттан өч буын ФӘЙЗУЛЛИННАР да үз халкының гореф-гадәтләрен хөрмәт итәләр, балаларда ата-бабаларга карата хөрмәт тәрбиялиләр. Ә шәхси үрнәк, билгеле булганча, иң яхшы тәрбия ысулы.