Нурлат районы башлыгы "ВЗП-Биләр" хуҗалыгында чәчү эшләренең барышы белән танышты
Алмаз Әхмәтшин хуҗалыкның ике отрядында булды.
Яз һәм Хезмәт бәйрәме алдыннан Нурлат районы башлыгы Алмаз Әхмәтшин "ВЗП-Биләр" җәмгыяте кырларында булды. Ул хуҗалыкның Кычытканлы һәм Колбай-Мораса отрядлары кырларында булып, эшләрнең барышы белән кызыксынды, кыр хезмәтчәннәре белән аралашты.
Хуҗалыкта шушы көннәрдә арпа һәм кукуруз чәчүгә керештеләр.
"Моңа кадәр 3,5 мең гектарда уҗымнарга ашлама керттек. Бу көннәрдә басуларда 36 берәмлек техника эшли, чәчүдә – 6 агрегат. Чәчү мәйданнарының мәйданы 12 мең гектар тәшкил итә, бу көннәрдә арпа, шулай ук кукуруз чәчәбез», – дип билгеләп үтте «ВЗП-Биләр» ҖЧҖ директоры Фәнис Якупов.
Хуҗалыкта билгеләп үтүләренчә, язгы кыр эшләренә беренче көннән үк оешкан төстә керешкәннәр, ашлама, орлыклар кайтартуда өзеклекләр юк, ягулык-майлау материаллары да җитәрлек.
Нурлат районында быел чәчү мәйданнары 51 мең гектардан артык тәшкил итә.
“Чәчү эшләре барлык мәйданнарның 20 процентында башкарылды. Бу-алдан ук яхшы әзерлек нәтиҗәсе. Беренче көннән бирле эш ике сменада оештырылган. Быел һава торышы да аграрийларга чәчү темпларын арттырырга мөмкинлек бирә. Язгы кыр эшләрен оптималь срокларда төгәлләргә планлаштырабыз", - дип билгеләп үтте Алмаз Әхмәтшин.