Нурлат шагыйрьләре һәм язучылары Чуаш теле көнен билгеләп үтте
«Дуслык» район газетасының чуваш дубляжы бүлеге каршындагы «Асамат кепере» (“Салават күпере”) әдәби-иҗат берләшмәсе әгъзалары Чуаш теле көнендә Халыклар дуслыгы йортында узган истәлекле очрашуның кунаклары булды.
Анда шулай ук районның Чуаш милли-мәдәни берләшмәсе Советының актив әгъзалары һәм җирлекара үзәк китапханәнең авыл филиаллары вәкилләре катнашты.
Очрашуны ачып, Халыклар дуслыгы йорты директоры Галина Терентьева Нурлат җиренең талантларга бай булуын билгеләп үтте. Аннан сүз кунакларга бирелде.
Владимир Кашкаров, Валентин Бурайкин, Андриян Григорьев, Иван Павлов үз иҗатлары белән таныштырып кына калмадылар, үз әсәрләренең тарихын да сөйләделәр.
Әйтик, Иван Павловның соңгы шигырьләренең нигезенә Донбассны азат итү буенча махсус операция барышында хәрби бурыч үтәгәндә һәлак булган якташыбыз ефрейтор Андрей Кульметьевның батырлыгы һәм каһарманлыгы салынган.
Валентин Бурайкин Чуаш теле көненең Иван Яковлевич Яковлевның туган көне белән символик рәвештә туры килүен билгеләп үтте. Чөнки ул гомере буе чуаш халкы өчен яшәгән һәм эшләгән. Чуаш балалары өчен мәктәпләр ачкан, чуаш әлифбасы язган, рус әдәбиятының иң яхшы әсәрләрен чуаш теленә тәрҗемә иткән. Икенче күренекле чуваш шагыйре Петр Хузангайның хезмәтенә баш ию йөзеннән Валентин Михайловичның сонеты яңгырады.
Андриян Григорьев матур һәм тирән мәгънәле шигырьләрендә туган телгә мәхәббәтен белдерде. Владимир Кашкаров чуаш халкының үз китапларын багышлаган данлы уллары турында сөйләде.
Бу ел әдәби-иҗат берләшмәсе өчен юбилей елы, шуңа бәйле рәвештә авторлар үз планнары белән дә уртаклашты, алар арасында чираттагы җыентыкны чыгару да бар.
Китапханәчеләр адресына да бик күп җылы сүзләр яңгырады, алар белән авторлар һәрдаим тыгыз хезмәттәшлектә эшли.
«Безгә Сезнең белән эшләү бик күңелле», - дип билгеләп үтте җирлекара үзәк китапханә директоры Роза Липатова һәм алга таба да нәтиҗәле уртак эшчәнлеккә өмет белдерде.
Авыл китапханәчеләре дә үз фикерләре белән уртаклашты. Андреевка авылыннан Нина Иванова авторларга китапханә стеналарында үткәрелә торган иҗади очрашуларга һәм бәйрәм чараларына һәрвакыт шат булуларын әйтте. Балалар өчен юморескалар язу һәм зур булмаган сәхнә әсәрләре дә яңгырады. Галина Терентьева сүзләренә караганда, болар барысы да балаларны туган телне өйрәнүгә җәлеп итәргә ярдәм итәчәк. Чөнки ул чуаш мәдәниятеннән аерылмый, шуңа күрә аны яратырга һәм кечкенәдән белергә кирәк, дип ассызыклады Галина Владимировна.
Очрашу бик җылы һәм күңелле узды. Ул бу көздә Халыклар дуслыгы йортында узачак Чуваш шагыйрьләре һәм язучылары съезды – зур очрашуның игелекле башлангычына әверелде.