ЮХИДИнең Нурлат бүлеге җитәкчесе Илдар Әхмәтҗанов: “Юл хаталарны кичерми”

2021 елның 3 июле, шимбә

Бүлекнең тулаем эшчәнлеге турында без полиция майоры Илдар Әхмәтҗанов белән сөйләштек, аның белән ул өч елдан артыграк җитәкчелек итә.

• Илдар Зөфәрович, район газетасында, телевидениедә, «Нурлат-информ» сайтында, шулай ук социаль челтәрләрдә Сезнең бүлекнең эше даими яктыртыла, үткәрелгән рейдлар нәтиҗәләре, статистика, юл хәрәкәте өлкәсендәге законнардагы үзгәрешләр һәм башка бик күп нәрсәләр китерелә. Бу бит шулай ук Сезнең эшегезнең бер юнәлеше.
• Әйе, әлбәттә, пропаганда – ЮХИДИ эшчәнлегенең йөзе. Кылынган эш өчен җәза бирүгә караганда, аны кисәтү мөһимрәк. Кагыйдәләрне үтәү машина йөртүчеләрнең һәм хәрәкәтнең башка катнашучыларының тормышын саклап кала ала. Халыкка нәкъ менә шуны җиткерергә тырышабыз да. Балалар белән юл-транспорт имгәнүләрен профилактикалау буенча үткәрелүче чаралар аерым урын алып тора. Бу юнәлештә без шулай ук өзлексез эш алып барабыз.
• Сез Нурлат шоферларының машина йөртү культурасы турында нәрсә әйтер идегез?
• Гомумән алганда, соңгы өч елда юллардагы хәл уңай якка үзгәрә. Зыян күрүчеләр булган юл-транспорт һәлакәтләре саны шактый кимеде, аларда һәлак булучылар саны да азаюы да сөендерә. Биредә автоинспекторларның профилактик эшен генә түгел, юлларны төзекләндерү, тротуарлар төзү, яңа җәяүлеләр кичү юллары барлыкка килүне дә билгеләп үтәргә кирәк. Республика һәм район җитәкчелеге, моңа зур игътибар бирә. Акча күбрәк бүлеп бирелгән саен, юллар да сыйфатлырак була бара. Шуңа бәйле рәвештә аларда һәлакәтләр саны да кими.
• Дәүләт автоинспекциясенең 85 еллыгын бәйрәм иткән көннәрдә хезмәттәшләрегез турында нәрсә әйтер идегез?
• Беренче чиратта, ветераннарыбызны билгеләп үтәсе килә. Без алар белән элемтәдә торабыз, яшь хезмәткәрләр белән очрашуларга чакырабыз. Һөнәри бәйрәм көнендә дә алар безнең белән бергә котлаулар кабул итәчәк. Гомумән алганда, безнең бүлек коллективы тату һәм максатчан. Барлык хезмәткәрләр, ә бездә нибары 9 кеше, район юлларында барлык хәрәкәт катнашучыларына куркынычсыз булсын өчен, үз хезмәтен бик яхшы башкара. Алар оператив карарлар кабул итәргә һәм катлаулы хәлләрдә эш итәргә сәләтле. Аларның һәрберсе тырыш, башкаручан, үз бурычларын белә. Киләчәктә дә шулай эшләрбез дип уйлыйм.
• Шоферларга нинди теләкләрегез бар?
• Беренче чиратта, автомобильнең техник торышын карап торсыннар һәм юл хәрәкәте кагыйдәләрен үтәсеннәр иде. Исегездә тотыгыз: юл хаталарны кичерми һәм юлда беркайчан да беренче була алмыйсың. Иң мөһиме – бер-береңә карата итагатьле юлда булырга кирәк, ул чакта безнең дә эшебез азрак булачак, үзегез дә өйдә көтеп торучы туганнарыгыз янына исән-имин кайтып җитәчәксез.

Автоинспекторларның төп бурычы-юлларда иминлек булдыру. Тик күп нәрсә машина йөртүчеләрнең үзенә дә бәйле бит. Безнең район юлларында хәрәкәттә катнашучыларның тормышы һәм сәламәтлеге турында кайгыртучы автомобильчеләр күбрәк булса, үзара аңлашу һәм хөрмәт хөкем сөрсә,  болар юлларда яхшы мөнәсәбәтләр урнашуга ярдәм итәр иде. Чөнки Дәүләт автоинспекциясенең Нурлат бүлеге эшчәнлегенең төп принцибы – хезмәттәшлек, ышаныч һәм куркынычсызлык.