Иске Чаллы авылында узган чаңгы ярышлары җиңүчеләре һәм призерларына Герой портреты төшерелгән кубоклар тапшырылды
Советлар Союзы Герое Николай Синдряков истәлегенә багышланган традицион чаңгы ярышларында 120дән артык спортчы катнашты. Ярышларда Нурлат районы спортчылары белән беррәттән күрше Әлки һәм Чаллы-Башы районнарыннан да кунаклар катнашты.
Быел ярышларны яшь чаңгычылар өчен яхшы үрнәк күрсәтеп 75 һәм аннан өлкәнрәк, шулай ук 60-69 яшьлек спорт ветераннары башлап җибәрде. Аннары җиңү өчен көрәшкә район мәктәпләре командалары кушылды.
Эстафетада яшүсмерләр арасында Иске Чаллы мәктәбенең беренче командасы җиңү яулады, икенче урында - Нурлат шәһәренең 8 нче мәктәбе, өченче урында - Иске Чаллы мәктәбенең тагын бер командасы.
Эстафетада кызлар арасында 8нче номерлы мәктәп командасына тиңнәр булмады. Икенче урында-Андреевка һәм Богдашкино мәктәпләре җыелма командалары, хуҗалар исә өченче урынны яуладылар.
Нәтиҗәдә, гомумкоманда зачетында шәһәрнең 8нче номерлы мәктәбе командасы җиңү яулады.
Быел җиңүчеләр һәм призерлар грамоталар белән бергә истәлекле бүләкләр - Советлар Союзы Герое Николай Синдряков портреты төшерелгән кубоклар алдылар.
Алар әле озак вакытлар истәлекле турнирда катнашу һәм чаңгы ярышларында җиңү турында искә төшереп торыр.