Нурлат «Ледок» спорт мәктәбе тренеры Александр Елагин үз тәрбияләнүчеләре язмышына сизелерлек өлеш кертә

2021 елның 3 феврале, чәршәмбе

“Ледок” спорт мәктәбе тренеры Александр Елагин “Спорт мәктәбенең иң яхшы тренеры 2020” республика смотр бәйгесендә “Осталык һәм камиллек” номинациясендә беренче урынга лаек булды. Аның кул астында шөгыльләнүче балаларның әти-әниләре тренерның сәләтен, малайларны чын ир-егетләр спорты белән кызыксындыра белүен, аларның язмышына өлеш кертүен югары бәялиләр.

Боларның барсы хакында да интервьюдан укый аласыз.

• Александр Владимирович, үзегез турында бераз сөйләгез әле. Сез кайчан тимераякка бастыгыз?
• Мин үзем Түбән Камадан. Әтием хоккей секциясенә 7 яшемдә алып килде. Ул вакытта шәһәрдә Боз Сарае юк иде әле, ачык мәйданчыкта шөгыльләндек. Әти-әниләр безне иртәрәк китерәләр, чөнки шугалакны үзебез чистартып, аннан соң гына тренировкага чыга идек.
• Профессиональ спорт карьерагыз ничек башланды?
• Без хоккей мәктәбен урта мәктәп белән бер елда тәмамладык, һәм алага таба укыргамы яисә хоккей белән шөгыльләнүне профессиональ дәрәҗәдә дәвам иттерергәме дигән сорау туды. Мин укуны сайладым һәм Түбән Кама химия-технология институтына укырга кердем. Спортны да ташламадым, легионер буларак Татарстаннның төрле командалары өчен уйнавымны дәвам иттердем. 2006 елда мине Эдуард Шишкин һәм Игорь Тарасов белән “Ледок” командасы өчен уйнарга чакырдылар һәм Боз сараенда тренер вазыйфасын тәкъдим иттеләр. Әмма бу вакытта мин институтта укый идем, шуңа күрә ике елдан – институтны тәмамлаганнан соң гына нурлатка күченеп килә һәм тренерлык эшенә керешә алдым.
• Яшь хоккейчының юлы нәрсәдән башлана?
• Беренче ел ярым – ике елда аларны кәшәкәсез тимераякта шуу техникасына гына өйрәтәбез. Балаларга дәресләрдә бары тимераяклар һәм шлем гына кирәк булачак, тренировкалар төрле уеннар һәм эстафеталар белән, ярымкүңел ачу формасында уза, башта разминка үткәрелә. Кече яшьтән спорт белән шөгыльләнүчеләрдә дисциплина, җаваплылык хисе, хезмәт сөючәнлек хисе югары була.
• Яшь спортчыларда иң беренче чиратта нәрсә тәрбиялисез?
• Үзе, тулаем команда өчен җаваплылык хисе. Шулай ук коллективизм хисе дә көчле, иң мөһиме “мин” түгел, команда булырга тиеш.
• Сез үз эшегезне, хоккейны яратасыз һәм моны шәкертләрегездә дә тәрбияләргә омтыласыз. Хәтерлим әле, сез аларны туган шәһәрегезгә алып барып, аның истәлекле урыннары белән таныштырган идегез. Аннан соң балалар Боз Сараенда чын хоккей матчын карадылар. Бу сезнең шәхси инициативагыз булдымы?
• Әйе, балаларга үзем туып үскән шәһәремне күрсәтәсем килде. Без аттракционнар паркында булдык һәм Кама елгасы буенда йөрдек. Сәфәребезнең тагын бер сәбәбе – Континенталь  хоккей лигасының матчы иде, ул малайларга үзенә күрә тренинг булды. Һөҗүмчеләргә – команданың һөҗүм ясаучы уенчыларын күзәтергә куштым, сакчылар – сакчылар, капкачылар исә капкачылар уенывн карарга тиеш иделәр. Шул рәвешле, балалар чын осталарның уенын, үзләрен бозда ничек тотуларын карадылар, үзенчәлекле дәрес алдылар. Аларның кайберләре беренче тапкыр КХЛ матчын трибуналардан карады.
• Сез шәкертләрегезнең спорт карьерасын дәвам итүләрен теләр идегезме?
• Бала өметле булса, аны башка клублар да күреп ала һәм үзләренә күчәргә чакыра... Әлбәттә, әгәр дә синең шәкертең Россиянең танылган клубларының берсенең данын якласа, бу бик күңелле хәл. Аларның берсе булса да зур уңыш казанса, димәк, көндәлек тренировкалар, башка шәһәрләргә уеннарга бару нәтиҗә бирә, һәм биредә минем дә тренер буларак хезмәтемнең өлеше бар.
• Әңгәмәгез өчен рәхмәт!