Марат Кәлимуллин истәлеге Кубогы Нурлаттан Лениногорскига күченде

“Ледок” Спорт сараенда быелгы сезон да Марат Кәлимуллин итсәлегенә Кубок турнирыннан башланып китте. Бу юлы төп трофей өчен дүрт – “Нефтяник” (Лениногорск), ЦСК ВВС (Самара), “Яр Чаллы” (Яр Чаллы) һәм “Ледок” (Нурлат) командалары көч сынашты. Асылда ата-аналар һәм “Ледок” Спорт сарае инициативасы һәм иганәчелеге белән узган ел башланып киткән турнирның монысы да матур бәйрәм буларак үтсен өчен боз сарае җитәкчелеге быел тагы да зур көч куйды: яңа Кубоклар эшләттеләр, шәхси номинацияләрдә призлар әзерләделәр. Турнирның төп кунаклары исә, әлбәттә инде, Маратның туганнары булды. Быел аның әтисе Лотфулла Кәлимуллин да килгән иде һәм ярышларны тантаналы ачу вакытында ул оештыручыларга рәхмәтен дә, яшь хоккейчыларга теләкләрен дә җиткерде. “Маратны олылаган өчен зур рәхмәт сезгә, бүгенге ярышлар да, алдагы гомерегездә булачак бәйгеләр дә җитди җәрәхәтләрсез үтсен, зур уңышларга ирешегез”, – диде ул. “Сез утырган самолетлар, поезд, автобуслар һәрчак төзек булсын, һәр сәфәрдән өйләрегезгә исән-имин кайтып җитегез”, – дип өстәде Маратның Нурлатта яшәүче апасы Гөлфия Адеева. Хоккейчы-якташыбызны бер минутлык тынлык белән искә алганнан соң, бөтен игътибар боз мәйданчыгына күчте. “Ледок” командасы “Яр Чаллы” белән булган беренче уенның шактый уышлы үткәрде – кунакларны 4:1 исәбенә отуга иреште. Икенче матчта Самараның ЦСК ВВС командасын да әлләни авырлыкларсыз гына 5:2 исәбе белән тар-мар иттеләр “ледоклылар”. Әлеге ике матч барышында иң күп алкышлар “Ледок” һөҗүмчесе Валентин Кирилловка булгандыр, мөгаен. Беренче уенда ул көндәшләре капкасына өч гол кертте. Тик менә “Нефтяник” белән булган төп уенда Валентинга да, тулаем, командага да чак кына уңыш җитеп бетмәде. Матч тәмамланырга ике минутлап вакыт калып барганда, көндәшләр хәлиткеч гол кертеп, Марат Кәлимуллин Кубогын Лениногорскига алып киттеләр. 

Турнир турында тулы язма – “Дуслык”ның 79нчы санында