Нурлатта Сабантуй узды

Бәйрәмне ачу тантанасында нурлатлылар һәм кунакларны Н.Шарапов сәламләде: “Бүгенге бәйрәм төрле милләттәге кешеләрне җыйды, монда татарлар гына түгел, руслар да, чувашлар, үзбәкләр, азәрбәйҗаннар, әрмәннәр башка халыклар да бар. Бүгенге бәйрәм хакына күп көч һәм тырышлык куелды. Һәрберебезнең фидакарь хезмәте аркасында, без бүген Нурлат районын республикада иң имин төбәкләрнең берсе дип әйтә алабыз. Барлык нурлатлылар да бу көнне каршы алыр өчен тырышып хезмәт куйдылар, шуңа да ял итәргә, бәйрәмгә тулы хаклары бар аларның. Алда хезмәт мәшәкатьләре шактый әле, печән өсте дә, урак та бар. Һәм әйбәт итеп эшләгән кеше, яхшы ял итә дә белә. Моны нурлатлылар елның-елында раслап килә.

Бүгенге бәйрәм авыр, әмма игелекле һәм тирән хөрмәткә лаек булган крестьян хезмәтенә дан җырлау булсын иде. Әйдәгез, бәйрәмне бергәләп билгеләп үтик. Һәм һәрвакыт шундый шат күңелле, көләч йөзле булып калыйк! Хуш киләсең, Сабантуй!” – дип мөрәҗәгать итте ул барысына да.

Ә көндезге 11дә спорт-массакүләм һәм күңел ачу чаралары – милли көрәш, ат чабышлары, төрле уеннар башланды, төп сәхнәдә республиканың танылган артистлары һәм район талантлары чыгыш ясадылар.