Нурлатта Дәүләт әләме көненә чаралар бәйрәм концерты белән дәвам итте
Чәршәмбе көнне без дәүләтебезнең иң мөһим сисмволарыннан булган Россия Федерациясе әләме көнен билгеләп үттек. Дәүләт әләме илебезнең бердәмлеген, бәйсезлеген һәм суверенитетын билгели. Шул уңайдан кичен үзәк паркта “Россия – бөек ил” дип аталган бәйрәм концерты үтте, анда районыбызның иҗат коллективлары һәм үзешчәннәре белән бергә Казаннан махсус кунаклар – “Black jack” кавер-төркеме дә катнашты. Бәйрәм программасыннан “Яшь гвардия” активистлары да читтә калмады. Алар “Триколор” акциясе оештырып, шәһәрлеләргә дәүләт әләменең өч төсен чагылдырган тасмалар тараттылар, бәйрәмнең тарихы турында сөйләделәр, ә теләүчеләргә Россия әләме төсләреннән аквагрим ясадылар.
– Без ел саен Россия Федерациясе Дәүләт әләме көнендә катнашабыз, ул бездә зур илебез, ватандашларыбыз өчен горурлык хисләре уята, – дип уртаклашты 8нче мәктәп укучысы Камилла Мифтахетдинова.
Парк буйлап моторлар гөрелтесе, сигналлар һәм биек итеп күтәрелгән Россия әләмнәре белән “Мотолайф” клубы әгъзалары да әйләнеп уздылар. Алар шәһәрдәге чаралардан читтә калмый.
– Без концертны бәйрәм уңаеннан, нурлатлыларга яхшы кәеф бүләк итү, алар тарихны белсеннәр һәм хөрмәт итсеннәр дип оештырдык. Шәһәрлеләрнең чарага килүләре, аның дәүләт бәйрмнәренә битараф булмаулары шатландыра, – ди район башкарма комитеты мәдәният бүлеге начальнигы Ләйсән Нәфыйгина.