Нурлат аграр техникумының “НАТс” командасы Татарстан Республикасы Хөкүмәте Кубогына КВН буенча чемпионатның супер-финалына чыкты

Бу атнада Нурлат КВН рухында яшәде дип әйтергә мөмкин. Чөнки 4 көн дәвамында шәһәр Мәдәният сарае базасында  КВН буенча чемпионатның зона туры узды. Республиканың Әлки, Алексеевск, Яңа Чишмә, Аксубай, Спас һәм Нурлат командалары республиканың тәҗрибәле КВНчылары кул астында әлеге уенның серләренә өйрәнделәр.

• Командалары инде әзер программалар белән килде. Без бары тик аларга ниндидер киңәшләр бирдек, каядыр дөресләдек, юнәлеш бирдек. Сәхнәдә шаярулар кызык кына түгел, актуаль дә булырга тиеш, – ди  бу көннәр дәвамында КВНчылар белән белән бергә булган ТРның КВН төбәк иҗтимагый оешмасы администраторы Екатерина Захарова.
• Бу көннәр эчендә бик актив –  иртәдән кичкә кадәр эшләргә туры килде. Укулардан бик арып кайта идек. Әмма шулай да тәҗрибәле КВНчыларның дәресләре бик файдалы булды. Алар безне күп нәрсәгә өйрәттеләр, – ди аграр техникум командасы капитаны Ренат Фәсхетдинов.

Нурлат студентлары исә чемпионатка бик зур әзерлек алып барганнар, аларның чыгышы төрле, шул исәптән җирле темаларга да шаяруларны үз эченә алган. Сәламләү, музыкаль номер һәм разминка бүлекләрендә исә аларга төрле яклы сәләтләрен – шаянлык, тапкырлыкларын гына түгел, сәхнә осталыкларын да күрсәтергә туры килде. Әмма Нурлат студентлары өйдә кем хуҗа булуын раслый  алдылар – 13, 8 очко белән  “НАТс” беренче урынга чыкты һәм супер-финалга юллама алды. Алга таба аларга Баулы, Буа, Байлар Сабасы, Әтнә районнары командалары белән көч сынашырга туры киләчәк. Гомумән, финал уены бу көнне тамаша залын тутырып утырган Нурлат яшьләре һәм укучыларының күңеленә хуш килде.

Республикада КВН буенча мондый Чемпионат әле беренче тапкыр гына үткәрелә. Оештыручылар әйтүенчә,  районнарда КВН хәрәкәтен үстерү, күбрәк яшьләрне бу хәрәкәткә җәлеп итү, аларның тормышын җанландыруны максат иткән чемпионатның зона турлары оешкан төстә үтә.  

• Нурлат районы җитәкчелегенә  чараны шундый югары дәрәҗәдә оештырырга булышулары, шартлар тудырулары өчен рәхмәт, – дип белдерде финал уены тәмамланган соң КВН буенча Чемпионат директоры Рамил Агдеев һәм зона турында катнашкан һәр командага тиздән Казанда үтәчәк зур КВН фестиваленә чакырулар тапшырды. Призлы урыннарны алучы командаларга Нурлаттан да истәлекле бүләкләр әзерләнгән иде.

Шулай итеп, КВН тәмам... Әмма Нурлат студентлары өчен, җырдагыча, башлана гына әле ул. Чөнки алда аларны супер-финал көтә.